Yasay kang Pelaez: Wala ko mamulitika
I CAMPAIGN for the vision of the Governor, not politicizing issues. Kini ang mga pulong nga giluwatan ni Misamis Oriental Provincial Board Member Dexter Yasay ngadto kang Bise Gobernador Jigjag Pelaez sa akusasyon sa naulahi nga daw pamulitika lamang ang intensiyon kon ngano giungkat ang isyu nga mokaon sa P600,000 nga gasolina ang mga salakyan sa bise gobernador matag bulan hangtud karon; dili pagtungha sa iyang mga empleyado sa opisina, apan nagdawat og sweldo; ug walay tungha-tungha sa sinemanang pagpakayab sa nasudnong bandila matag adlaw’ng lunes sa kapitolyo.
“If you accuse me of politicking by resorting to trial by publicity, ang isyu ba sa wala nako igkakita nga mga salakyan sa opisina sa Bise Gobernador nga mukaon ug dul-an P600,000 nga fuel, pamulitika diay na? Sa isyu sa mga tawo nga walay tungha-tungha sa opisina sa Bise Gobernador apan nag sweldo, pamulitika diay na? Sa isyu ba kalabot sa mga kawani sa opisina sa Bise Gobernador nga dili muapil sa Flag Raising ug Flag Retreat Ceremony, pamulitika ba diay na? Sa isyu ba nga akoang gipagawas nga mga kawani sa opisina sa Bise Gobernador ang exempted sa biometrics, pamulitika diay na?” pulos pangutana ni Board Member Yasay ngadto sa bise gobernador nga hangtud karon ang tubag nagtangag pa sa dakung ganti.
Matud ni Board Member Yasay, dili pamulitika ang mangutana nga nagkinahanglan sa hustong tubag gikan sa nalambigit niini. Gani, gihimong ehemplo sa magbabalaud si Gobernador Bambi Emano nag-respeto gayud sa bandila sa Pilipinas isip pagtamod sa iyang kaugalingong kamanduan nga tanan gayud kawani sa kapitolyo motambong niini.
“Unya, unsa may basis karon sa opisina sa bise gobernador nga nipagawas man ug memo nga supak sa maong direktiba sa Gobernador?” pangutana sa magbabalaud ngadto sa presiding official sa Sanggunian.
Wala direktang nakatubag ang bise gobernador sa mga pangutana ni Board Member Yasay, hilabina kon ngano naka-ingon kini nga namulitika lamang ang naulahi sa mga isyu nga iyang gipangbutyag atol sa ilang regular session. Hangyo sa bise gobernador nga tubagon na lang kono niya pinaagi sa sulat.