Police officer Caayupan, padisunggan; tunolan sa ayudang pinansiyal

SAMTANG gikasubo ni Gobernador Bambi Emano ang gidangantan ni Police Staff Sargent Ronald “Boboy” Mugot Caayupan sa nahitabong shootout sa Libertad checkpoint niadtong Pebrero 17, 2020, garbo sa gobernador ang talagsaong kaisog nga gipakita sa nasangpit nga pulis pagbatok sa mga dautang elemento.

Sa sunod nga panagtapok sa Provincial Peace and Order Council (PPOC) sa Misamis Oriental, gilaumang pasidunggan ang bayanihong paghalad ni Caayupan sa iyang kinabuhi malikay lamang sa mga kriminal ang katawhan sa Misamis Oriental.

Samtang nagpahigayon sa checkpoint ang grupo ni Caayupan sa lungsod sa Libertad, gikabutyag nga gipara niini ang Mitsubishi Mirage. Mihunong ang salakyan sabay pabuto sa ilang armas ngadto’s kapulisan. Mibalos ang grupo ni Caayupan hinungdan sa kamatayon sa usa sa mga suspetsado. Usa pa ka pulis ang samdan sa nasangpit nga insidente.

Dunay nakuha nga klase-klaseng de kalibreng armas ug granada sulod sa sakyanan, lakip pa lima ka sachet sa gituhoang shabu.

Gimanduan na ni Gobernador Bambi Emano si PNP Provincial Director Roy Bahian nga ipadayon ang pursuit operation sa nahibiling duha ka mga suspetsado samtang palawman ang imbestigasyon ug ikiha ang mga responsabli.

Hugot ang suporta ni Gobernador Bambi Emano sa atong kapulisan isip mga tigbalantay ug tigpanalipod sa katawhan, hilabina niadtong walay ikasukol sa kriminal. Aron mas magkugi pa sila, kabahin sa pahalipay sa gobernador ang ayudang pinansiyal hilabina sa pamilya nga gibiyaan sa ilang minahal. PIO