Krisna, Ing Pekamatimyas Dili (Krishna, the All-Attractive)
Kanita mika-sukdulang masampat a penandit at inya, king pamamanlag ding talatag ding batwin nang Royni, kisna ya king kauryan. Ding sablang batwin at labwad tinikdo la king masampat a kabilyan. Mika-lagnas a kapayapan, kinislap la ngan ding batwin king banwa at ding kalungsuran, balen, pisogan at kulkulan sula ati la king pekadakila dang kabilyan.
Agnan deti ding ilig a malino at lawang malagu karing tukal, kambe ring kawan da ring ayup at aptas da ring kambubuyug a magdalit kapuryan asna kayumu king malukalak a kakewan, ing angin asna kabanglu at alang alikabuk linabul banayad kabang ding api ring pari lalagablab manene at alang patna.
Ing isip da ring matenakan a ligaligan da ring asura, linino inyang ing kabilyan da ring tambul minaksing lang agnan-agnan bang pagmasusyan ing kebaytan ning E Mibait. King Kinara at Gandarwa migdalit la, ding Sidda at Tsarana migdaun lang pangadi at ding Bidyadarang babai, tinerak lang kisnang sigla kambe ring Aspara.
Ding makebyasnan at ding dyos matula lang menyalbag karing mangasanting a bulaklak at ding biga taimik lang binalikwas anting alun king dagat king pekamadalumdum nang penandit ning bengi nang Dyanardana, ing Masampat a Talapagnasa, pepalto king nwan nang aske Debaki. Ing Ginung Bisnu, ing Metung a makatuknang king pusu ding baling metung pepakit lang laganas, anti king kabilugan ning bulan a saslag king paralaya.
Itang makapagmulalang bingut a makitmala-tula a mata at ding apat Nang gamat tatalan lang sandata, makagayak yang Sribatsang tanda, kambe ning maningning a sula king Keyang batal, makasulud dilo imalan at maki-iro dampula mengari karing bigang uran.
I Basudeba atambaran neng makagayak asna legwan kikislap king baiduyra, makimitampukang putung, ating sula karing balugbug na, makibwak asna kabalikoko, susulud babat asna kalagu king awakan na at sulang gamat at karing gamat na.
I Anakadundubi mengasdan ya king pamanakit na king malagung pamipalto ning Ginu anting keying mambang. Mesaul king dakilang tula melili ya king paninap a pamagmasusi king pamanguldas nang Krisna, metung a kapagmasuyan a nung nu ya mambag apulung libung baka karing pari.
O mambang nang Barata, king pamisanak nang ing bingut Ya pin ing Ketawang Pigmulan, milako ngan ing keyang takut. King kapasyan king sampulung a ita apasaya na ning Keyang upaya, sinakab ya at kabang makasaklub palad bang magdaun panalangin king bingut a migpa-aslag king pibaytan na karing sablang dane.
Nganang Basudeba: ‘Ika kanakung Panginwan, ing Pigmulang Ketawang Tune a linagpus king makalabwad a kalikasan, Ika ing lubusang pamisanak at ligaya king tune nang aske, ing kebyasnan a magbante karing baling metung. Ika bitasa Ya a, kaybat ning kamumulan kapamilatan ning sarili Mung sikanan lelangan me ing labwad ayni a gawa king atlung kabilyan, tutuki bala linub anting pamikatawan tau dapot king kamatutwanan ali Ka.
Mengari king dalumat ding makalabwad a sangkap a e migbayung ganap, agya mang mibulug la karing dakal a pamisamut-samut Iding miyayaliwang pamiyabe-abe ring miyayaliwang makakawaning sikanan a king pamisamut da migaganap king metusikluban. Kaybat ning pamiyabe da linto anting ding makalabwad a sangkap a ding pigmulan a bage liban da ing kapaglalangan kaybat nita, dapot ita e milyari uling ing yatung ini e milyari uling mimiral nay a kanita.
King antimuring paralan o Ginu, magmatulid king tutung kebyasnan at kauryan a Ika, agya mang makasuglung karing bage ring panamdam, at kabilyan ning kalikasan, e mapapalyari kapamilatan da ring makalabwad a kauryang deta. Ika, bilang ganap, e kamisasakupan kareta. Uling ika ing uyat ding baling metung at sablang bage alang bage a makalwal o makapalub Keka, ing Dakilang Kaladwa ding sablang mimiral.
Ninu man king kabilyan a makikilala anting makalabwad a katawan malalaus gagalo antimong atin yang pamiiral para king sarili na a makakawani king pigmulang sarili o kaladwa, bolang ya. Metung yang taung mali king pamangilala na king sarili a misakwil anting bolang king kalulangan na king makatud a pamanyuri at magkulangan king ganap a pamisalang-alang “kanita”.
O Pekamayupayang Ginu, ing beytan, ing pamanyese at wakas ring segana-gana a ati karin, anting sampulung ding talapagaral, pauli Mu a timawa karing sablang kikilingan, timawa king pamagbayu, at timawa karing kabilyan. E salungat iti uling Ika, a Ginu at Kakataskatasang Kaladwa mu naman, ing migaganap king matibe balangkas da ring kabilyan na ning kalikasan.
Ika na pin inya sa’t tatalan bang asalese ing karatunan karing atlung labwad kapamiltan ning sikanan Mu, maputing aske king Kaladwa (king kayapan at belwan), ing kule malutu magmula king matikding panamdam ning kapaglalangan (kimut) at anti mu rin ing aske ning dalundum (kelangbyesnan) para king katatawlyang pangalaso.
Balu mu ing kasalungsungan o Metung a Mayupaya, pepakit king pibale-bale ku anting Kaganapan ning Pamanampat king kapagnasang ipanglwalu a ing labwad ayni
at parusan la ring mangarawak a ta at ding kawal da, a pesalan da ring kata-kata mabilug a yatu magkumwaring ari at makabangsa. Dapot ing alang-Dyos a Kamsa at inung, aybat nang dindam dikil king beytan Mu king pibale-bale mi, pemate na no ngan ding kapatad a mibait bayu Ika O Ginu da ring kaladwang makitakut king Dyos, mipabalwan karing pekapun ding kawal na king Kekang pamipalto at alang pamikakunung daklut karing sandata na. Nganang S’uka: ‘Kaybat dag ikit a ing mambang da kisna Yang panugali ning Kakataskatasang Ketawan, i Debaki, a malambat nang tatakut kang Kamsa dapot negni masayang mengasdan king panyatang nang Krisna, midaun yang panalangin Kaya.
Nganang Debaki: ‘Anting sangkap ning kekatamung pamisanmetung king pamiyali-aliwa, mayayaus Kang e Ing Metung a Atitingiran, ing Metung a Pigmulan, o Kaladwa, ing sala, ing katimawan babo ding kabilyan, ing e magbayu, at dalise king pamiiral. Ika ing Metung a e mapipitna a timawa karing makalabwad a kapagnasan a yang Ginung Bisnung mismu, ing alsag ning Dakilang kaladwa. Kayabat ding kata-kata at katakatang banwa ing sikluban mulandit ya king sikoti na at ding mumunang sangkap misamut la karing minunang aske at sablang pepalto ning sikanan ning Panaun palub king e mayayakit, Ika o Ginu a Makilagyung Dakal, ing kamemetungan a mitagan. ~ Srimad Bhagavatam, Dalit 10: Dangka 3: Sunis 1-18
Agkatan da kang mambag o midake nanu mang Kapampangan a kawatasan, sanese, sisti, kasuryan o nanu mang dikil king Kapampangan. Nanu mang kutang o sisti king misulat king Kapisik, malyaring ikutang o malinawan king talasulat. Pakiparala king email address, garciakragi@yahoo.com o iyaus o i-text king +639988948624 o + 639423924399. Nung karapatdapat ya’t makayagpang king dalerayang tuntunang Kapisik, masa kang mirinang kapakibatan at milimbag ya sanu man kareng tutuking dangka ning Kapisik. Ipisik me, abe!