FILIPINO: WIKA NG SALIKSIK
HILDA GONZALES GUTIERREZ
Tuwing Buwan ng Agosto, ipinagdiriiwang natin ang Buwan Ng Wika bilang pagbibigay halaga sa ating wikang Filipino. Ngayong taon, ang tema ng pagdiriwang ay “Filipino, Wika ng Saliksik.” Layunin nitong bigyang pansin ang paggamit ng ating sariling wika pagdating sa pagbabahagi ng mga kaalaman sa ibat-ibang disiplina ng pagtuturo. Ngunit, ang tanong- kung ang mga magaaral ang tatanungin, kilala pa ba nila ang ating wikang Filipino?
Nang minsang mapadaan ako sa kumpol ng mga mag-aaral, may mga salita akong narinig mula sa kanila na tila ay bago sa aking pandinig. “LODI ka talaga pre”, “Wala kang katulad, PETMALU kang tunay”, “Kilala mo naman ang APORT mong yun”- napaisip ako, saan kaya nila natutuhan ang mga ganoong salita? Ano kaya ang mga kahulugan ng kanilang binabanggit? Sa aking pagtatanung-tanong, nalaman ko na ang mga salitang bago sa aking pandinig ay mga salitang binasa lamang pala pabalik- IDOL para sa LODI, ang MALUPET ay PETMALU at ang TROPA ay APORT. Kung ganito na magsalita ang mga kabataan ngayon, may pagpapahalaga pa ba sila sa ating wikang Filipino?
Sa aking sariling obserbasyon, mas madali na ngayon para sa mga kabataan ang gamitin ang mga salitang umusbong kasabay ng pag-unlad ng teknolohiya. Ngunit karunungan nga bang maituturing ang paggamit ng mga salitang ito? -marahil ay hindi para sa akin. Naisip ba natin kung pag-unlad nga bang maituturing ang ganitong pagbabago ng mga salita at mas pagbibigay ng atensyon sa mga ito kaysa sa pag-aaral sa mismong wikang Filipino?
Bilang isang guro, ang tema ngayong taon sa pagdiriwang ng Buwan ng Wika ay isang pagkakataon at hamon upang bigyang pansin ang nagiging impluwensya ng mga salitang nauuso sa social media sa pang-araw- araw na pakikipag-usap ng ating mga mag-aaral. Paano magiging daan ang ating sariling wika sa pagbabahagi ng karunungan at kaalaman sa ating mga kabataan kung ang kanilang lengwaheng nakasanayang gamitin ay pagpalit-palitin ang mga salita?
Upang maipalaganap ang wikang Filipino bilang wika ng saliksik, nararapat lamang na matutunan itong gamitin ng mga kabataan di lamang sa loob ng paaralan kundi maging sa mga lugar na pinupuntahan nila. Simulan natin ang pagpapalaganap nito sa ating mga silid-aralan nang sa gayon ay bata pa lamang, maipaunawa na natin sa mga bata kung bakit dapat nilang bigyan ng mataas pagpapahalaga ang ating wika.
Ilan sa mga nakikita kong posibleng maging paraan ay pagkakaroon ng oras sa paaralan na tanging wikang Filipino lamang ang gagamitin upang masanay sila sa ating wika. Imulat natin sila sa kahalagahan ng wikang Filipino lalo na pagdating sa pakikipag komunikasyon sa iba. Sa pamamagitan nito, maiiwasan natin ang magkaroon ng pagkalito sa mga salitang hindi naman talaga parte ng wikang Filipino gaya ng mga nagsisilabasan lamang sa social media. . Maaring magbigay ang mga inimbento nilang salita ng maling kahulugan sa mga makakarinig sa kanila at sa kung ano ang nais nilang sabihin. Tignan din natin kung paano natin maikikintal sa kanilang isip ang nagagawa ng pakikipag-usap gamit ang tamang mga salita sa ating wika.
Walang masama kung sumabay tayo sa pag-unlad na dala ng modernong panahon. Ngunit kung ang magiging kapalit ng sinasabi nating pag-unald ay pagkakaroon ng mababaw na pagpapahalaga sa ating sariling wika ay hindi na yata tama. Kung ating ipagkikibit-balikat ang mga ganitong pangyayari, baka isang araw ay mapalitan na ang wikang Filipino sa bagong pananalita ng mga kabataan.
— oOo—
The author is Teacher III at San Nicolas Elementary School, Arayat East District