KALIKASAN: ATING PANANAGUTAN
“Hindi na masama ang pag-unlad at malayu-layo na rin ang ating narating. Ngunit masdan mo ang tubig sa dagat dati’y kulay asul ngayo’y naging itim”. Ang awiting ito’y hango sa kanta ng bandang Asin na nagpapahiwatig tungkol sa ating kapaligiran.
Ang kalikasan ay biyayang galing sa Poong Maykapal kaya’t ito’y ating alagaan at pagyamanin. Ating itaguyod ang isang balanseng kalikasan, alisin ang mga basura at usok. Itapon ang basura sa tamang lalagyan at ang hindi wastong paggamit ng kemikal ay atin ding iwasan dahil nagiging sanhi ito ng pagkasira ng ating kapaligiran. Dapat nating panatilihin ang kaayusan at kalinisan sa ating paligid dahil ito’y ating pananagutan dito sa sanlibutan. Ang pagputol at pagsunog ng mga puno sa kabundukan ay isa ring sanhi ng kapabayaan sa ating kapaligiran. Ito rin ay ang sanhi ng paglubog sa mga lugar na mabababa at ng sa kapatagan dahil ang mga ugat ng mga puno ay ang sumisipsip ng tubig sa kabundukan. Isa ring dahilan ng pagputol ng mga puno sa kabundukan ay ang mga negoyante na nagpapayaman para sa sariling kapakanan at hindi iniisip ang mga maaaring mangyari sa mga mamamayan.
Ang pagpatay ng mga isda sa ilog at dagat sa pamamagitan ng pagpapasabog ng dinamita ay nagdudulot ng pagkaubos ng mga isda sa dagat. Ang mga nakakalasong kemikal na itinatapon ng mga iba’t ibang pabrika ay nagiging sanhi ng polusyon sa katubigan. Ang pagtatapon ng mga patay na hayop at basura sa ilog ay nakakasama rin sa ating kapaligiran. Marami pang mga bagay na dapat iwasan para sa kabutihan ng ating kapaligiran. Kailangan na tayong magising sa katotohanan na ang tao ang lumilikha ng kanyang ikakapahamak. Meron tayong mga bagay o paraan para mapangalagaan ang ating kapaligiran. Katulad ng 3RS – Recycling, Reusing and Reducing, pagtatanim ng mga puno, paglilinis sa mga kanal at estero, ang tamang pangagalaga sa ating mga yamang lupa at yamang dagat. Halina’t ating tuparin ang pagsagip sa ating Inang Kalikasan dahil ito’y yaman na dapat ingatan at alagaan na ipinagkaloob sa atin ng Poong Maykapal para sa sangkatauhan at sa mga susunod pang henerasyon.