PAGTAWID SA PEKENG BALITA
EDMOND O. YUMANG
Ayon sa sarbey, cellphone ang unang tinitingnan ng kabataan pagkagising sa umaga. Facebook, tweeter, Instagram at marami pang ibang halimbawa ng social media. Libo-libong impormasyon kada araw ang dumaraan sa ating mga mata. Paano ba natin matitiyak kung tama ba o mali ang mga impormasyong ito lalo na’t ugaling Pilipino na sa unang tingin o basa pa lamang ay pinaniniwalaan na ito?
Maraming positibong naidudulot ang social media sa buhay natin pero may kakambal din itong negatibo. Paano ba natin sinisipat ang mali sa tama o ang tama sa mali? Ika nga nila, “think before you click” at lalapatan ko ito na aking sariling bersyon… “think twice before I believe.” Ang fake news ay mga impormasyong hindi totoo, gawa-gawa at walang katotohanan. Sa madaling salita, retokado! Isa lamang ang magandang solusyon sa problemang fake news na naglipana sa social media… ang pagsuri at pagtiyak sa binasa. Una, kanino galing ang impormasyon? May kredibilidad ba ang taong nagpost nito? Ikalawa, ano ang intensyon o kaya naman ay motibo ng taong nag-post nito? At ikatlo, bilang mambabasa, dapat ba akong maniwala agad sa aking binasa o nakita?
Nilikha tayo ng Diyos na may dalawang mata at dalawang teng. May magandang layunin bakit tigdalawa nga ba. Ito ay upang makita at marinig natin ang dalawang panig ng kwento. Kailangang malimi natin kung ito ba ay tama o mali. Ganiyan dapat natin tinatanggap ang bawat impormasyong nababasa natin gamit ang social media upang sa gayon ay hindi tayo maloko o maisahan ng fake news.
Ang tanging solusyon ay magbasa nang magbasa nang magbasa… magbasa ng maraming reperensiya upang sa gayon ay makita at malaman ang tama sa mali o mali sa tama. Iwasang maniwala o mapaniwala kaagad ng iyong binasa. Tawirin mo ito sa pamamagitan ng tamang paghakbang. Huwag kang lumundag o kaya naman ay tumakbo. Maglakad lamang upang maramdaman ang bawat yugto ng katotohanan sa likod ng iba’t ibang post gamit ang social media.
— oOo—
The author is Teacher III at Santos Ventura National High School-SHS