WIKA NG TEKNOLOHIYA
EDMOND O. YUMANG
Put… .ina! Bobo! Kaya mo iyan! Napakahusay mo! Pare-parehong salita, iba-iba ang kahulugan at iba-iba ang dulot nito sa atin. Positibo o kaya naman ay negatibo, Maaaring nakakatuwa o nakakaiyak… nakabubuhay o kaya naman nakamamatay. Iyan ang mga idinudulot ng wika sa atin. Ilan lang iyan sa mga salitang nababasa natin gamit ang teknolohiya o ng social media.
Ang wika ay pangunahing kasangkapan ng tao upang makapagpahayag ng kaniyang kaisipan, damdamin at saloobin. Sa pamamagitan ng paggamit nito, kaya nating matiyak kung ano ang nais nating ipahayag sa aing kapwa. Kaya nating kumontrol ng ating kapwa, nakapagbibigay din tayo ng akmang impormasyon tungkol sa mga bagay-bagay, malaki rin ang naitutulong nito upang maisulat ang kasaysayan na siyang pagbabatayan ng susunod na henerasyon. Kung wala ang wika, titigil ang paglinang ng tao sa kaniyang sarili at paligid. Napakahalaga ng wika sa ating sarili, sa pamilya, sa komunidad at sa lahat. Ang kapangyarihang dulot nito sa atin ay di kayang sukatin nang sino man. Ang pagkawala ng wika sa buhay ng tao ay tulad ng isang halaman na tinanggalan ng hangin at tubig. Ganiyan ang kapangyarihan ng wika sa tao. Mawawalan ng saysay ang buhay kung wala ang wika. Espesyal itong regalo ng Diyos sa atin bilang tao sapagkat ito rin ang gamit ng Panginoon upang mas maunawaan natin ang tamang daan na dapat tahakin natin. Pero nagagampanan ba natin ng tama ang responsibilidad ng paggamit ng wika sa social media?
Hindi natin kailangan ang ano mang kapa na isusuot sa ating likuran upang masabing super hero tayo. Lahat tayo ay makapangyarihan sapagkat may wika tayong ginagamit. Ito ang siyang magpapaangat sa atin o magpapabagsak sa atin. Kaya sa susunod na paggamit natin nito, tiyakin natin na magamit natin ito nang tama at akma lalo na sa social media.
— oOo—
The author is Teacher III at Santos Ventura National High School-SHS