ARALING PANLIPUNAN TUNGO SA MAKABAGONG PANAHON

MIRRIAM BELONIO CANLAS

Kasabay ng pagikot ng mundo ay pagbabago hindi lamang ng panahon kundi pati na rin ang pag-iisip ng mga tao. Sa katunayan, kahit saan mang panig ng mundo maraming pagbabago mula sa sinaunang sibilisasyon patungo sa modernisasyon ang ating matutunghayan sa lipunang kani- kaniyang ginagalawan. Kalimitan, ang kaisipan ng marami ay nakatuon sa pagnanais na mabago ang kanilang kalagayan sa lipunan. Ngunit ano ng ba ng kahalagahan nito?

Ang lipunan ay isang mahalagang aspekto sa buhay ng bawat tao sapagkat ito ay binubuo ng iba’t-ibang uri ng mamamayan, heograpiya at kasaysayan, pulitika, ekonomiya, at iba pang disiplinang may kinalaman dito. Ayon kay Emile Durkheim, isang Pranses na dalubhasa sa sikolohiya “Ang lipunan ay isang buhay na organismo kung saan nagaganap ang mga pangyayari at gawain. Ito ay patuloy na kumikilos at nagbabago. Binubuo ang lipunan ng magkakaiba subalit magkakaugnay na pangkat at institusyon. Ang maayos na lipunan ay makakamit kung ang bawat pangkat at institusyon ay gagampanan nang maayos ang kanilang tungkulin.” Dahil sa ang lipunan ay itinituring na buhay na organism kagaya rin natin itong kumikilos at nagbabago. Malaki ang ating naiaambag sa pagsulong nito. Malaki rin ang ating

responsibilidad bilang miyembro nito. Gayundin naman ang pananaw ni Charles Cooley, isang Amerikanong dalubhasa sa pag-aaral sa mga alituntunin at mga proseso sa lipunan.

Ang lipunan ay binubuo ng tao na may magkakawing na ugnayan at tungkulin. Nauunawaan at higit na nakikilala ng tao ang kaniyang sarili sa pamamagitan ng pakikisalamuha sa iba pang miyembro ng lipunan. Makakamit ang kaayusang panlipunan sa pamamagitan ng maayos na interaksiyon ng mga mamamayan.” Kung kaya’t ang pagaaral sa lipunang ating ginagalawan ay mahalagang maunawaan ng bawat mag-aaral upang mapalawak at mapalago ang kanilang kaalaman sa bawat aspekto nito at kanilang higit na maunawaan ang kanilang tungkulin bilang bahagi nito.

Bilang paghahanda sa mga mag-aaral sa kanilang naka-ambang mahalagang tungkulin at responsibilidad sa lipunan, ang Kagawaran ng Edukasyon ay bumuo ng makabagong pamamaraan upang malinang ang kanilang kakayanan. Kaya naman nagkaroon ng mga pamantayan sa pagtuturo ng Araling Panlipunan batay sa itinakda ng K-12 Kurikulum. Mula sa unang baitang hanggang ika-labindalawang baitang, naka-angkla ang mga paksain at pamantayang pang-nilalaman at pamantayan sa pagganap ng bawat yunit sa pitong tema:

1)tao, kapaligiran at lipunan 2)panahon, pagpapatuloy at pagbabago, 3)kutlura, pananagutan at pagkabansa, 4)karapatan, pananagutan at pagkamamamayan 5)kapangyarihan, awtoridad at pamamahala, 6)produksyon, distibusyon at pagkonsumo 7)at ungnayang pangrehiyon at pangmundo. Samantala, ang kasanayan sa iba’t-ibang disiplina ng Araling Panlipunan tulad pagkamalikhain, mapanuring pag-iisip at matalinong pagpapasya, pagsasaliksik o pagsisiyasat, kasanayang pangkasaysayan, pakikipagtalastasan at pagpapalawak ng pandaigdigan pananaw ay kasabay na nalilinang ayon sa kinakailangang pag-unawa at pagkatuto ng magaaral sa paraang pagpapalawak.

Sa pamamagitan ng makabagong pamamaraan ng pagtuturo sa Araling Panlipunan, tayo bilang mga guro ay tiyak na makakahubog ng mamamayang mapanuri, mapagmuni, mapanagutan, produktibo, makakalikasan, makabansa at makatao na may pambansa at pandaigdigang pananaw at pagpapahalaga sa mga usaping pangkasaysayan at panlipunan. Ang mga mag-aaral ay siguradong makabubuo ng sariling kahulugan at pagpapakahulugan sa bawat paksang pinag-aaralan at magkakaroon ng aplikasyon sa tunay na buhay na may kabuluhan mismo sa kanya at sa lipunang kanyang ginagalawan.

— oOo—

Ang may akda ay guro sa Araling Panlipunan sa Saint Joseph School of Candaba, Tenejero, Candaba, Pampanga