TAMANG WIKA

Ang mundong ginagalawan natin ay nagsilang na ng produktong instant. Lahat ay nagnanais na mapabilis ang anomang bagay na nakapaligid sa atin. Ang pagkain, gawain, relasyon, pakikipagkaibigan, pananamit, pagkilos, maging ang ating pagsasalita ay ninanais nating ihakbang lamang ng isa ang kabuuang kilometro. Daig pa natin ang mga umaarangkadang mga sasakyan mula sa Fast and the Furious at si Sleeping Beauty na kakapikit lang ay nariyan na agad ang halik ng kaniyang prince charming. Mabilisan…walang kontrol… tila hindi pinag-iiisipan. Ganito rin ba tayo mangusap sa ating kapwa? Hindi dumadaan sa proseso…? Walang preno…? O baka naman isa tayo sa LAHING MEMA?

Ayon kay Henry Gleason, ang wika ay isang masistemang balangkas ng sinasalitang tunog na pinili at isinaayos sa paraang arbitraryo upang magamit ng mga tao sa pakikipagtalastasan na nabibilang sa iisang kultura.” Tandaan, pinili at isinaayos. Ang pagpili at pagsasaayos ay nangangailangan ng paggugol ng oras at panahon upang maging mainam at kaaya-aya ito.

Ang salita ay makapangyarihang sandata na maaaring magdugtong at kumitil ng buhay. “Ang nasabi ay nasabi na at hindi na ito mababago.” Maging maingat sa pagpili, pagsasaayos at paggamit nito. Gamitin ito ng positibo pagkat batid nating ibinigay ito sa atin upang gamitin sa ganitong kapamaraanan. Higit na tatamis ang bawat relasyon kung sasangkapan ito ng ‘tamang panahon.’ Mapakla ang lasa nang hindi hinog na bunga ng pagsasalita. Hayaan nating mahinog muna ito upang sa gayon ay maging kasing tamis ng pulot-pukyutan ang bunga nito. Masarap ang mangusap gamit ang wika.

Kailan nga ba nagiging tama, may tama at may patama ang isang salita, pangungusap o kaya naman ang isang pahayag na ating ginagamit? Ang pagpili, pagsasaayos at paggamit ng salita, pangungusap at pahayag ay hindi natutuldukan sa taong nagsalita. Ka-angkla nito ang taong tumantanggap. Ang kahulugan ng ating narinig ay nakadepende pa rin sa paraan ng pagtanggap ng ating kapwa.

Matuto tayong maghintay at magproseso. Huwag tayong mataranta sa paggamit at pagtanggap ng wika. May tamang oras. May tamang panahon. Tandaan, anomang dumaan sa mabilisan ay may kapalit na kapahamakan.

--oOo— The author is Master Teacher I at Santos Ventura National High School (SHS)