Naghihingalong Panitikan
Marilyn C. Badaran
MAHALAGA ang oras sa ating lahat, ito ay dumadaan lamang at hindi ito hihinto upang maghintay sa atin. Ang nasayang na oras kailanman ay di na mababawi pa at dahil dito kailangan nating gamitin ito sa tamang paraan.Hindi nalalayo ang problemang ito pagdating sa pagtuturo ng ating sariling panitikan.
Sa pamamagitan ng pagtuturo at pagkatuto ng panitikan, naipakikita nito ang ating panlipunan at panlahing pagkakakilanlan, nasasalamin dito ang pinagmulan ng isang lahi, pagsulong at pag-unlad ng ating bansa. Ipinahahayag nito ang isang damdamin, karanasan at panaginip ng sangkatauhan na nasusulat sa masining at malikhaing paraan sa pamamagitan ng estatikong anyo at kinapapalooban ng masining na kaisipan.
Ngunit ang malaking katanungan ay nararamdaman pa kaya ng mga kabataan ang ibig sabihin ng panitikan? Kaya naman ay nababasa pero ‘di nauunawaan? Tumimo ba at napahalagaan ang bawat titik na nakalimbag dito? Hindi maikakaila na mula noon hanggang ngayon ang panitikan ay pilit na naisasantabi at di binibigyan ng importansya bilang pinagmulan ng kanilang lahi
Isa sa nasisilip kong dahilan nito ay ang kakulangan sa oras ng pagtuturo sa panitikan. Sa loob ng klasrum, minsan tila isang mini-teleserye ang nagaganap… may nag-aaway, nagkakasakit na kailangang dalhin sa pagamutan, may mga katanungan na di mo maisip kung paano naisip at saan nagmula at marami pang iba.
Dahil tayo ay guro na mapamaraan at nakikipamahay sa mundo ng teknolohiya, mainam din na mapalaganap ang pagtuturo ng panitikan gamit ang internet kung hindi sapat ang oras na ginuguguguol sa paaralan. Maaari tayong gumawa ng pahina sa social media upang doon lahat i-upload ang mga nais nating iparating sa mga mambabasa lalo na sa mga mag-aaral.
Maliban sa mga nabanggit, tayong guro pa rin sa Filipino ang mabisang sandata upang maituro ng tama ang panitikan sa mga mag-aaral. Oo tunay ngang naghihingalo na ang panitikan sa ating bansa ngunit kundi tayo kikilos kailan pa? Tandaan “Walang Mandirigmang Sumusuko sa Gitna ng Labanan.” nasa gitna tayo ng digmaan at dapat huwag tayong titigil at isuko ang laban.