MGA SULIRANIN SA PAGTUTURO NG EDUKASYON SA PAGPAPAKATAO
Jessie P. Dungca
Ang K to 12 ay ang bagong kurikulum na kung saan ay magkakaroon ng malaking pagbabago at pag-unlad sa parte- ng mga mag-aaral at guro. Sa pamamagitan ng programang ito ng Departamento ng Edukasyon ay malilinang ang problemang pangkabuhayan ng mga mag-aaral sapagkat ito ay naglalayong matutunan ng mga mag-aaral na hasain ang karunungan nila sa iba’t ibang uri ng hanapbuhay pagdating nila sa ika-11 at ika-12 baitang na tinatawag na Senior High School.
Guro ang susi sa lahat ng suliranin ukol sa mabisang pagtuturo. Kung baga sa isang manggagamot, nararapat pulsuhan ng guro ang kanyang mga mag-aaral, damhin at pakinggan ang tibok ng kanilang puso, pag-aralan ang sanhi ng kanilang karamdaman bago lapatan ng kaukulang lunas. Ayon kay Papham (1980), malaki ang tungkuling ginagampanan ng guro sa pagpapaunlad ng mga kakayahang taglay ng mga mag-aaral. Ang ang kanyang impluwensiya sa lipunan at sa paghubog ng mga kakayahan ng mga mag-aaral ay hindi matatawaran kailanman. Bilang magulang, siya ang nagsisilbing uhay sa pagpapalago at pagpapayabong ng anumang kakayahan mayroon ang mga mag-aaral.
Sa napakalaking pananagutang ito, nararapat lamang na taglay ng guro ang mga katangiang tunay na papatnubay sa kanyang mga tinuturuan upang magabayan ang mga ito nang lalong malinang ang kakayahan at abilidad upang maging epektibo hindi lamang sa silid-aralan kundi higit sa lahat, maging huwaraan, epektibo at maging malaya sa pakikilahok sa kanyang lipunang patuloy na nagbabago.
Lalo’t higit sa Edukasyon sa Pagpapakatao na kung saan ay napakahalaga sapagkat dito ay matutunan ng mag-aaral ang pagkatao, pakikipagkapwa, lipunang ginagalawan, pagpili ng propesyon sa hinaharap at pagkamaka-Diyos. Mas epektibo ang paraan ng pagtuturo kung ang guro ay gumagamit ng video o film viewing, gayundin ang power point na kinakailangang matutunan ng mga guro upang mas malinang ang kanilang kaalaman sa paggamit ng makabagong teknolohiya. Bilang pagtugon sa hinihingi ng programang K to 12 ay nararapat lamang na pag-aralan na ng bawat guro ang paggamit ng computer sapagkat papaano malilinang ang kanyang mag-aaral kung siya mismo na guro ay hindi batid ang gamit ng makabagong teknolohiyang ito.
Malaking suliranin ang kinakaharap ng mga guro sa ESP sa lahat ng antas ng pag-aaral. Bagamat patuloy na lumalawak at lumulusog ang kalagayan ng asignatura sa panahong ito ng makina at plastik ay patuloy naman lumalaki ang pangangailangan ng mga pamaraan at kabatirang nauukol sa kung paano higit itong matatanggap, mapalalaganap, mauunawaan at maitataguyod sa mga paaralan. Kasama na rito ang pagtuturo ng mga guro na hindi medyor ang ESP at naatasan lamang na magturo ng namumuno sa paaralan. Idagdag pa ang kakulangan ng mga kagamitang panturo na mkatutulong sa pagtaas ng antas ng pagtuturo ng mga guro.
Hinihiling ng mga kawani ng gobyerno na nawa’y matugunan ng pamahalaan ang mga suliraning ito upang mas maging kapaki-pakinabang ang pagtuturo ng mga guro at ang pagkatuto ng mga mag-aaral.