Ganti ng Kalikasan
Lesley A. Angeles
Pagputok ng Pinatubo , storm- surge ,ipo-ipo, lindol at iba pa. Mga sakunang nararanasan ng mga tao dulot ng pagkasira ng kalikasan. Sakunang kumikitil ng libo-libong buhay na nagdudulot ng pighati sa mga naiwan. Nangwawasak ng mga ari-arian at bayan na tuluyang nabubura sa mapa. Hindi kayang pigilan ng makabagong teknolohiya. Bakit nangyayari ang lahat ng ito? Sino ang dapat sisihin?
Ang paggamit ng teknolohiya ay hindi nakasasama kung ito ay nasa ayos. Madalas hindi natin napapansin na dahil sa paghahangad natin ng pag-unlad gamit ang makabagong teknolohiya ay naaapektuhan ang ating inang kalikasan. Nasasaktan at dumadaing ng hindi natin naririnig o ayaw nating pakinggan. Iniisip natin na ang ating ginagawa ay para sa ikabubuti ng bansa. Subalit sa tuwing tayo ay gumagamit ng teknolohiya sa paglinang ng ating kapaligiran ay may hindi magandang nangyayari. Gaya ng bulkang Pinatubo, walang nakaaalam sa ating panahon na ito ay isang bulkan at sumabog daan-daang taon na ang nakalilipas. Dahil sa ito ay napaliligiran ng maraming hot spring ay naisipan ng mga tao na posibleng makakuha rito ng geothermal energy na magagamit natin sa elektrisidad para maging progresibo ang bansa. Sa kasamaang palad, dahil sa mga prosesong isinagawa ay nasaktan ang kalikasan at natutong gumanti. Ganti na marami ang naapektuhan.
Sa kabilang dako, ang mga yamang -tubig na pinagkukuhanan ng pagkain at ikinabubuhay ay inaabuso sa pamamagitan ng paggamit ng mga pamamaraang ilegal tulad ng dinamita. May malalaking pabrika na nagtatapon ng nakalalasong kemikal na nagiging dahilan ng pagkamatay ng mga isda at iba pang yamang-tubig. Maging ang mga simpleng mamamayan ay walang malasakit sa mga ito kaya ginagawa itong tapunan ng basura. Dahil sa ganitong nakagawian ay nakararanas ang mga tao ng matinding baha tuwing umuulan sapagkat hindi makadaloy nang maayos ang tubig.
Isa pang sanhi ng pagbaha at pagguho ng lupa ay ang illegal logging at pagmimina. Nakakalbo ang mga kagubatan at nauubos ang mga yamang -mineral na nagiging sanhi ng pagguho ng lupa. Sa ngayon ang pamahalaan ay ginagawa ang malawakang pagtatanim ng puno sa mga bundok at pagpapatigil ng pagmimina.
Ang mga nabanggit na sitwasyon ay ilan lamang sa mga kasalanang ginagawa natin sa kalikasan na minsan ay hindi natin alam. Kaya sa kasalukuyang panahon ay gumagawa ang mga tao ng mga hakbang upang maisaayos at maitama ang mga kamaliang nakagisnan na natin. May mga programa tungkol sa pagsagip sa mga ilog at iba pang yamang –tubig.
Ngayon ay alam na natin ang dahilan kung bakit nangyayari ang mga bagay na ito. Na ang lahat ay epekto ng pagbabago at kawalan ng malasakit ng mga mamamayan sa kapaligiran. Mapupuna rin natin na hindi man kumikibo ang kalikasan ay may nais parin siyang iparating sa atin. Pahalagahan at ingatan ang kalikasan para sa mapayapang pamumuhay upang ang susunod na henerasyon ay hindi na matitikman ang mga ganitong uri ng kalamidad na naranasan natin.
--oOo-
The author is Teacher III at Angeles City Science High School