Modernong Yeso

RAQUEL T. LUGTU

Sa pamamagitan ni Charles Babbage at Nikola Tesla ay lumaganap na marahil ang isa sa mga bagay na kailangan ng isang tao sa modernong panahon ngayon. Ito ay ang kompyuter at teknolohiya, na nakapagpabago sa simpleng pamumuhay natin noon. Ang kompyuter at teknolohiya ay ilan sa mga modernong kasangkapan na nagpapalawak sa ating kaalaman at nagpapadali sa mga bagay at tulad nito ay ang paggawa ng mga takdang aralin at pananaliksik sa ating paaralan.

Isa sa mga pinakaimportante sa tao ay ang edukasyon, kaya sa murang edad pa lamang ay tinuturuan na tayo sa ating mga paaralan dahil ito ang ating magiging pundasyon sa ating hinaharap. Marahil, madami sa atin ang nakakaalala na noon, wala pang teknolohiya sa ating mga silid-aralan at tayo noon, kailangan magsulat sa ating kwaderno, kailangan ng manila paper kung mag-uulat sa klase, pupunta sa mga silid aklatan para manaliksik at kailangang may libro, blackboard at yeso palagi para makapagturo ang guro. Ngunit ngayon, mayroon ng phones at kompyuter para humanap ng sagot sa takdang aralin sa internet, projector sa harap para makapag ulat at maaari ka ng sumagot ng mga pagsusulit, takdang aralin at magsaliksik kahit nasaan ka man basta mayroong teknolohiya. Hindi natin maitatanggi na malaki ang naging epekto ng teknolohiya sa ating pag-aaral sa ating panahon lalo na ito ang naging daan para mas lalong umunlad at mapadali ang pagtuturo ngayon, ngunit hindi sa lahat ng panahon ay nakakabuti ang teknolohiya sa ating paaralan. Dahil sa teknolohiya at paggamit ng kompyuter ay may posibilidad na dumepende na lamang ang mga estudyante sa internet kahit hindi na naiintindihan ang kanilang mga binabasa at hindi nahahasa ang kanilang mga pag-iisip. Ang teknolohiya ay maaring maabuso sa loob ng silid aralan sa pamamagitan ng pagtetext at pagbrowse sa social media sa oras ng klase. Ngunit sa kabila ng mga negatibong maaring maging senaryo sa loob ng silid aralan, ang teknolihiya ay mayroon din magandang maidudulot sa atin tulad ng mas malawak ang matututunan ng mag-aaral, mas mapapadali ang pakikipag-ugnayan kahit na malayo sa isa’t isa, mas madaling gawin o kalkulahin ang mga grado ng mga estudyante at higit sa lahat, ang teknolohiya sa edukasyon ay isang malaking hakbang para sa kaunlaran ng isang komunidad at bansa.

Sa ating modernong panahon, madaming trabaho noon ang nangangailangan ng teknolohiya ngayon. Maraming estudyante ang natututo kung paano gumamit ng kompyuter at teknolohiya sa kani-kanilang paaralan at kahit na sa tahanan. Ang teknolohiya ay naging kasama na natin sa ating pang araw – araw na pamumuhay. Ang bansa ay umuunlad sa maraming paraan sa pamamagitan ng teknolohiya at hindi natin makakaila na tayo ay nakadepende sa paggamit ng mga ito. Ngunit naisip mo na ba kung kailangan ba talaga ng teknolohiya ang edukasyon? O kailangan nga ba ng edukasyon ang teknolohiya? Ang mga doktor, inhinyero, arkitekto at mga dalubhasa sa teknolohiya ay ilan lamang sa nangailangan ng edukasyon para maging eksperto sa teknolohiya at maging handa sa kanilang mga tungkulin. Sa pamamagitan ng edukasyon ay mas lalong lumalawak ang kanilang kaalaman sa kani-kanilang larangan sa trabaho at ito ang nagiging daan para sila ay maging mga eksperto. Sa kabilang banda, ang edukasyon at kaalaman ay hindi lamang natututunan sa mga paaralan at nasosolusyonan ng teknolohiya. Ito ay maaaring matutunan sa ating mga tahanan, sa payo ng mga nakakatanda sa atin, sa ating mga kaibigan o maging sa ating paligid. Sa simpleng mga bagay na ating nararanasan sa labas ng ating paaralan, ito na ay isang kaalaman na hindi masasagot ng teknolohiya.

"Technology can become the “wings” that will allow the educational world to fly farther and faster than ever before—if we will allow it." - Jenny Arledge. Sa modernong panahon natin ngayon na malawak ang maari mong malaman, hindi lamang dapat tayo nakadepende sa kung anong itinuro o nalaman natin. Wag nating limitahan ang ating sarili sa mga bagay na gusto o maari pa natin malaman dahil may teknolohiya man o wala sa ating paaralan, nawa ito’y hindi maging hadlang para ikaw ay matuto at maging gutom sa kaalaman. Hindi sa nasusukat sa grado o marka kung ano ang iyong nalalaman ngunit kung paano mo ito gamitin sa realidad na buhay at kung pano mo gagamitin ang teknolohiya sa responsableng pamamaraan sa kaalaman.

--o0o-

The author is SST II San Roque Dau High School