WIKANG KAPAMPANGAN PARA SA BAYANIHAN KONTRA PANDEMYA
Roselle P. De Jesus
Paano ba nakabahagi ang wikang Kapampangan laban sa krisis na COVID-19? Mula nang magsimula ang pandemiyang ito, ang mga lokal na pamahalaan ay gumawa ng mga programa na makatutulong sa mga mamamayan na labanan ang kinakaharap na krisis. Si Pampanga Governor Dennis G. Pineda ay isa sa mga aktibong nagpahayag ng suporta sa pamahalaan upang masiguro ang kapakanan ng mga Kapampangan. Isa sa mga tiniyak niya ay ang pagkakaroon ng sapat na pagkain para sa mga Kapampangan at ang mabilisang pagkalat ng mga impormasyon sa sambayanan.
Ang wikang Kapampangan ay may mahalagang papel na ginagampanan sa pabatid-publiko sa mga mamamayan upang higit na maintindihan ng mga tao ang nais na iparating sa kanila. Kabilang sa mga ito ang pagbabalita sa telebisyon ng CLTV-36 na nasa wikang Kapampangan at ang istasyon sa radyo na DWGV-AM at maging sa bawat barangay ay may mga nakapaskil na mga anunsyo na nakasulat sa wikang Kapampangan upang sa ganitong paraan ay maipabatid nang maayos ang mga panawagan. Ang mga nanunungkulan sa bawat barangay ay tinitiyak na maipaabot sa mga tao ang mga impormasyong nasa banyagang wika ang pagpapaliwanag gamit ang wikang Kapampangan.
Sa ganitong paraan ay naipapamalas ang bayanihan ng mga Kapampangan. Ang paggamit ng wikang Kapampangan ay malinaw na pagtugon sa pangangailangang maipaabot at maipahatid ang mga impormasyong may kinalaman sa pandemya. Gayundin, sa pamamagitan ng paggamit ng wikang Kapampangan ay naiaalis ang takot at pangamba sa bawat tao sapagkat ang isyung ito ay napaguusapan sa wikang ang bawat isa ay komportableng maipahayag ang saloobin at damdamin maging ang mga realidad na kaganapan sa lipunan ngayong panahong ito.
Totoong ang paghahatid ng mga impormasyon na nauunawaan ng mga tao ay maituturing na paunang lunas upang malabanan ang kumakalat at nakamamatay na virus na ito. Ang pagsunod at pagkakaisa ng mga tao ang magiging daan upang maiwasan ang pagkalat ng sakit na ito. Malinaw na napagbubuklod ng wika ang mga tao kahit sa ganitong uri ng pagsubok. Panghuli, ang patuloy na panalangin at pananalig sa Poong Maykapal ay mahalagang sandata upang ang bawat isa ay malampasan ang krisis na nagpapahirap sa maraming tao hindi lamang sa ating bansa kundi sa buong mundo.
--oOo-
The author is Teacher III at Francisco G. Nepomuceno High School, Angeles
City