ILANG ESTRATEHIYA SA PAGBABASA

MAURO L. GARCIA

Ayon kay Goodman (Bernales, 2010), ang pagbabasa ay itinuturing na Psychological Guessing Game, dahil pinagagana natin ang isip sa pagtukoy at pag-unawa sa mga titik o salitang ating nababasa. Dito ay nakabubuo tayo ng bagong kaalaman batay sa teksto o anomang impormasyong ating nabasa. Sa pamamagitan ng kasanayang ito, natatamo ng bawat indibiduwal ang tagumpay, lalo’t sa larangan pang-akademiko hanggang sa marating ang inaasam na propesyon (McWhorter, 2009).

Hindi mapasusubalian ang kahalagahan ng pagbabasa. Tumutulong ito upang lalo nating makita, maunawaan, at mapahalagahan ang ating mundo. Pinapanatili nitong aktibo ang ating kaisipan at pinaiigting ang ating pagkamalikhain. Pinagyayaman nito ang ating kaalaman sa mga salita tungo sa lalong maunlad na pakikipagtalastasan, kaya’t malaking hamon para sa mga guro, gayondin sa bawat magulang, ang mapagbuti ang kasanayang ito ng ating mga mag-aaral.

Sa pag-asam nito, maaaring isaalang-alang ang ilan sa mga pamamaraan upang ito ay malinang. Una, sa pagbabasa, kailangang ang materyal na iyong babasahin ay may kaugnayan sa iyong gusto. Dahil dito, higit kang nagiging agresibo na malaman at maunawaan ang teksto. Ikalawa, hindi masamang magtanong. Kung sa pagbabasa mo’y mayroon kang hindi maunawaan, magtanong ka sa iyong magulang o sa sinomang higit na nakaaalam. Ikatlo, pagyamanin mo ang iyong bokabularyo. Maaari mong sangguniin ang iyong talatinigan o diksyonaryo upang maragdagan ang kaalaman sa mga salita o mga termino.

Sa huli, malaking pananagutan ang sa atin ay nakaatang sa pagpapaigting sa kasanayang ito ng mga mag-aaral, lalo’t ating napapansin ang kawalan nila ng sigla sa pagbabasa. Nawa’y makatulong ang ilang estratehiyang nabanggit sa pagpapaigting sa kasanayang ito. Tatandaang, tumatalino ang tao sa tuwing nagbabasa.

-oOoThe

Secondary School Teacher III at Angeles City National High School

author is