SILBI NG TEKNOLOHIYA SA PAGPAPALAWIG NG EDUKASYON SA PAMAYANAN

Walang pasubaling ang guro ay siyang pinakamabisang kagamitang panturo sapagkat sila ang tagapagpadala ng mga impormasyong galing sa hanguang batis ng kaalaman. Magkakaroon lamang ng progresibong pagkatuto kung ang guro ang magsisilbing lunsaran nito. Mula sa simpleng mga titik na nakalimbag ay magkakaroon ito ng diwa sa tulong ng mahikang taglay ng mga panday ng kinaadman. Ganiyan man madalas ang punto de bista ng karamihan subalit may iilang pagkakataon na ang mga mag-aaral ay nagiging mabisa ring midyum ng pagkatuto dahil ika nga nila na mayroon din silang matutuhan sa kanilang kapwa estudyante. Bilang pagpapalinaw, mapapatunayan na sa makabagong panahon ay hindi na lamang ang guro ang siyang mabisang tsanel ng kaalaman bagkus ay nariyan na rin ang mga mag-aaral subalit magkakaroon lamang ito ng matibay na suporta sa tulong pa rin ng mga guro. Kasabay ng pag-ikot ng mundo sa pagtuturo ay umiinog din ang mga kagamitang lalong humahasa sa talim ng isipan at paghulma sa puso ng mga magaaral. Isa na riyan ay ang paglawak ng naaabot ng teknolohiya sa usaping edukasyon.

Pinabibilis ng makabagong teknolohiya ang pagtuturo at pagkatuto sa loob at labas ng paaralan. Nakararating ang kaguruan pati na ang mga mag-aaral sa iba’t ibang lugar sa mundo kahit na nasa loob lamang sila ng silid-aralan. Nakikilala nila ang samot-saring personalidad kahit na nakaupo lamang sila sa upuan. Nararanasan ang mga makabuluhang pangyayaring naganap sa nakaraan at muling nababalikan ang mahiwagang kasasaysayan. Pinadadali rin nito ang pakikipag-ugnayan o ang komunikasyon ng guro sa kaniyang mag-aaral kahit na malayo sa isa’t isa. Higit sa lahat, nagkakaroon ng panibagong kakayahan ang lahat na tumuklas ng mga bagay na hindi na aabutin pa ng mahabang panahon ng paghihintay. Iilan lamang iyan sa nagagawa ng teknolohiya sa edukasyon. Binibigyan nito ang guro at magaaral ng dagdag na kasangkapan upang maging makabuluhan ang pagkatuto.

Marahil iisipan ng iba na hindi maganda ang teknolohiya sapagkat maaari nitong gawing palaasa ang bawat tao dahil sa iisang pindot lamang ay nakukuha na ang kagustuhan. Kabalintunaan ang ganitong pag-iisip sapagkat magiging katuwang ang teknolohiya sa pag-unlad kung gagamitin ito nang maayos at naayon sa tama. Laging tandaan na ang pagkakaroon ng regulasyon sa paggamit nito ay mauuwi sa maayos at progresibong pagkatuto at pagtuturo ng mga guro lalo na ng mga mag-aaral ng bayang Pilipino.

-oOoTHE AUTHOR IS TEACHER-I AT SAN MATIAS ELEMENTARY SCHOOL