ANG MGA PAGSISIKAP AT KAPARAANAN NG MGA GURO SA PAGTUTURO NG FILIPINO SA BAYAN NG MACABEBE
Ang pagtuturo ng Filipino para sa mga guro ay isang mapanghamong gawain sa kanila sa kasalukuyang panahon sapagkat hinahamon sila sa paraang paghahanda at pagpaplano ng mga panibagong estratehiya at iba’t ibang interaktibong gawain batay sa hinihingi ng bagong kurikulum, ang programang K to 12 alang-alang sa pagkatuto ng kanyang mga mag-aaral. Bagama’t sila’y gumagamit ng mga gabay sa pagtuturo o manwal ng Kagawaran ng Edukasyon (DepEd), hindi pa rin ito sapat kung walang kakayahang pangnilalaman na ituro ang mga aralin dito.
Sa isinagawang pag-aaral ni Ibay (2020), nailahad ang mga pangangailangan, pagsisikap, pamamaraan, at pagtugon ng mga guro sa Filipino sa Macabebe tungo sa pagpapayaman ng kaalamang panggramatika ng mga mag-aaral. Ito ay ang mga sumusunod:
Pangangailangan
Lumitaw sa nabanggit na pag-aaral na ang mga guro sa Filipino sa Macabebe ay nakararanas ng kahirapan sa pokus ng pandiwa, wastong gamit ng mga salita, at sa kawastuhan ng pangungusap. Sa madaling sabi, sila ay may suliranin pagdating sa Sintaks at batay sa nalikom na datos ay hindi sila mahusay rito. Sa kabilang banda, wala namang natuklasang suliranin sa Morpolohiya ang mga guro sapagkat ang kanilang antas ng kakayahan dito ay mataas at nangangahulugang may mahusay na kakayahan.
Pagsisikap at Pamamaraan
Sa lahat ng pagkakataon, sinisikap ng mga guro na maibigay ang kasingkahulugan at kasalungat ng mga salitang Filipino na may promedyong 4.35 at nililinang din nila ang mga matatalinhagang mababasa sa mga akdang pampanitikan na may promedyong 4.27. Ito ay dahil sa mga panitikan at lunsaran na ginagamit ng mga guro sa pagtuturo ng wika at panitikan. Kapansin-pansin din na madalas sinisikap ng mga guro na matukoy ang kayarian ng mga salita na may promedyong 4.14, ang paglikha at paggamit ng mga salita sa pakikipagtalastasan na may promedyong 3.73, ang paglapat ng angkop na mga panlapi na may promedyong 4.12, at ang pagbasa ng diksyunaryong Filipino na may 3.61 na promedyo. Ngunit, mababatid din na minsan, sinisikap ng mga guro na ipabasa sa kanilang mga mag-aaral ang diksyunaryong Filipino na may promedyong 3.37.
Sa lahat ng pagkakataon ay sinisikap ng mga guro na maiwasto ang mga pangungusap na may maling gamit ng mga salita na may promedyong 4.43, magamit ang angkop na salita sa pangungusap (4.41), magamit nang wasto ang mga bahagi ng pananalita sa pangungusap at ang makabuo ng isang malinaw at wastong pangungusap na may parehong promedyong 4.39. Sa ibang paraan, madalas na sinisikap ng mga guro na: matukoy nang wasto ang mga bahagi ng pananalita sa pangungusap na may promedyong 4.20, matukoy ang ayos at anyo ng pangungusap (4.10), magamit nang wasto ang mga pantukoy sa pangungusap (4.02), at ang matukoy nang wasto ang pokus ng pandiwa sa mga pangungusap (3.90). Sa kabuuan, ang mga guro sa Filipino ay nagsisikap na linangin ang kanilang kakayahan sa sintaks sa lahat ng pagkakataon na may promedyong 4.23.
Sa lahat ng pagkakataon ay sinisikap na maitama ng mga guro sa Filipino ang mga pagkakamali ng kanilang mga mag-aaral sa pagbuo ng mga pangungusap na may promedyong 4.53, na makapagpahayag ng kanilang sarili gamit ang wikang Filipino (4.51), masusing maihanda at maisaalang-alang ang mga simulain sa pagtuturo ng wikang Filipino (4.49), malaman ang mga teknik at estratehiya sa pagtuturo nito (4.47), mapukaw ang kanilang interes gamit ang mga kakaiba at nakawiwiling mga gawaing panggramatika (4.45), na magamit ang kompyuter o teknolohiya sa pagtuturo ng Gramatika (4.41), masunod ang alituntuning pambalarila sa wikang Filipino sa pagtuturo (4.39), at magamit ang mga karagdagang batis ng impormasyon o kagamitang panturo sa pagtalakay ng mga paksa sa Gramatika (4.33).
Kadalasan, sinisikap ng mga guro sa Filipino na makilahok sa mga palihan at mga pagsasanay ukol sa wika o asignaturang Filipino, at gawing sistematiko at sunud-sunod ang mga paksa sa Gramatika na may parehong promedyong 4.18, pagtuunan ng pansin ang Gramatika sa pagsulat (4.10), na wikang Filipino lamang ang gagamiting wikang panturo at magsagawa ng pangkatang gawain sa Gramatika na parehong may promedyong (4.06), maipabasa nang malakas sa klase ang mga akdang pampanitikan (4.00), na gumamit ng mga awtentikong kagamitan sa pagtataya ng pagkatuto ng Gramatika ng mga magaaral at makapagsagawa ng lekturang paraan sa pagtuturo ng Gramatika na parehong may promedyong (3.96), na magamit ang mga soap opera at mga pelikulang Filipino bilang lunsaran sa pagtuturo ng gramatika (3.92), makipagtalastasan sa ibang tao gamit lamang ang wikang Filipino (3.82), makalikha ng inobasyon sa pagtuturo ng gramatika (3.78). Minsan, ang mga guro sa Filipino ay nagpapakadalubhasa sa asignaturang Filipino sa pamamagitan ng pagkuha ng yunit sa antas Gradwado sa isang unibersidad (3.18).
Sa pagtuturo ng Filipino, mahalaga ang kahusayan ng guro sa Gramatika nito. Tunay na hindi maibibigay ang mga bagay na wala ang mga guro ng mga ito. Kung mahusay ang mga guro sa Filipino, maaaring mahusay rin ang kanilang mga mag-aaral. Subalit, nagkakataon din naman na mahuhusay ang mga guro subalit hindi ganoon kabilis at kabisa ang pagkatuto ng mga mag-aaral. Maraming ang mga motibasyon ng mga guro sa Filipino kung bakit natatamo nila ang tagumpay na ito. Kaya naman, dapat na bigyang pansin ang pagtamo ng napataas at napakahusay na kakayahan sa Gramatika ng mga guro.