PAGSANIB NG TRADISYON AT MODERNIDAD NG TEKNOLOHIYA SA ASIGNATURANG FILIPINO

MARASHANE M. MOJICA

Sa paglipas ng mga taon, nababago at umuunlad ang ating lipunan sa tulong ng teknolohiya. Ang sektor ng edukasyon ay hindi nagtatangi sa ganitong pagbabago, at isa sa mga asignatura na nakikinabang dito ay ang Filipino. Ang pag-unlad ng teknolohiya ay nagdudulot ng iba't ibang implikasyon sa pagtuturo at pag-aaral ng asignaturang ito. Ang isa sa mga positibo ay ang pagbibigay-daan sa mas interactive at partisipatibong pagaaral. Ang mga online platforms, tulad ng Google Classroom at learning management systems, ay nagbibigay ng oportunidad sa mga mag-aaral na mas mapanagot sa kanilang pag-aaral. Maaring magsumite ng mga gawain, magbahagi ng ideya, at makipagtulungan sa mga kapwa mag-aaral sa pamamagitan ng teknolohiya. Dagdag pa dito, isang malaking benepisyo ng teknolohiya sa pag-aaral ng Filipino ay ang mas mabilis at mas malawakang access sa iba't ibang sanggunian. Mula sa mga e-books, online articles, hanggang sa mga multimedia presentations, mas nagiging madali para sa mga mag-aaral ang makakita ng karagdagang impormasyon para sa kanilang pag-aaral. Nagbibigay ang teknolohiya ng mga pagkakataon para sa mas malalim na pag-unlad ng kasanayan sa wika. Ang mga online language tools at apps ay makakatulong sa pag-enhance ng mga kasanayan sa pagsulat, pagbigkas, at pang-unawa ng mga kahulugan ng mga salita. Sa kabilang banda, sa panahon ng teknolohiya, mas madaling kopyahin ang impormasyon mula sa internet. Ito ay nagdudulot ng panganib ng pangongopya, kung saan ang mga mag-aaral ay maaaring kumuha ng impormasyon nang hindi pinag-iisipang mabuti at hindi nagbibigay ng tamang kredito sa mga pinagkunan. Bagamat may mga language tools na makatutulong sa kasanayan sa wika, maaaring mawala ang personal na pagpapahalaga sa kultura at tradisyon ng wika. Ang palagiang pagsandal sa teknolohiya ay maaaring humantong sa kakulangan ng personal na koneksyon sa asignaturang Filipino. Kaugnay nito, ang pagaaral ng Filipino ay nangangailangan ng personal na interaksyon, partikular sa aspeto ng pagganap at pagsasalita. Ang sobrang paggamit ng teknolohiya, lalo na sa online classes, ay maaaring magdulot ng kawalan ng oportunidad para sa masusing pagtatagpo at talastasan ng mga mag-aaral sa wika. Sa kabuuan, ang teknolohiya ay mayroong magandang implikasyon sa pag-aaral ng asignaturang Filipino, ngunit hindi rin ito ligtas sa mga hamon. Ang mga guro at mag-aaral ay kailangang maging maingat sa paggamit ng teknolohiya at tiyakin na ang mga benepisyo nito ay naglalabas-pasok nang maayos. Ang pagsasanib ng tradisyon at modernidad ay isang mahalagang bahagi ng pag-unlad ng edukasyon, at sa tamang paggamit ng teknolohiya, maaari nating mapanatili ang kahalagahan ng asignaturang Filipino sa puso ng mga mag-aaral.

-oOoThe author is Secondary School Teacher II at Claro M. Recto Information and Communication Technology High School