SA ALS, MAY PAG-ASA! MARDI E. IGNACIO
“Walang rewind”, ito ang masaklap na katotohanan. Ang mga nangyari na ay mananataling pahina na lamang ng bawat kuwento. Hindi na ito mababalikan para itama pa. Gayunpaman, habang may buhay may mga sasalubong sa ating bagong umaga. Mga umaga na maisusulat ang karugtong na kabanata ng buhay. Sa bawat bahagi nito ay makakabuo ng bagong kuwento. Dito ay may pagkakataong pumili kung uulitin ang mga pangyayari nuon o tuluyan na itong lilisanin. Hindi na mabilang ang mga dahilan kung bakit natalikuran ng iba ang pagkakataong makapagtapos ng pag-aaral. Ilan na lamang sa mga madalas kong naaalala ang mga sumusunod na dahilan: Una, pagiging kabilang sa magulo o di buong pamilya. Ito ay ang kalagayang kabilang sa pagkakaruon ng magulang na naghiwalay. Isa sa sitwasyong hindi pinili ninuman. Ikalawa, pagkalulong sa iba’t -ibang bisyo, barkada, maagang pagbubuntis o mga bunga ng kapusukan. Ikatlo, kahirapan ng estado sa buhay. Kailangang magbanat ng buto para makatulong sa pamilya at ang ikaapat ay ang diskriminasyon, mas prayoridad ng magulang ang mapagtapos ang anak na lalaki kaysa babae. Sa mga iilang pinagtagpi-tagping kadahilang ito, nabuo ang Alternative Learning System o Alternatibong Sistema ng Pagkatuto. Ito ay programa na naglalayon, bigyan ng pangalawang pagkakataon ang mga kababayan natin na muling makapag-aral at makapagtapos ng Basic Education. Sa programang ay binibigyang pansin ang kalagayan ng mga nag-aaral. Ginagamit ang mga metodolihiya o pamamaraan sa paghahatid ng edukasyon na naaangkop sa kanilang katayuan at kakayahan. Gayunpaman, tinitiyak na ang mga kasanayan at kakayahan ay maituro at mapaunlad ng may kalidad. Ang ALS ay isa sa mga programa ng Departamento ng Edukasyon na sumasalamin sa masidhing hangarin ng ahensiya sa katagang “Walang Maiiwan” Maidadagdag din dito, ang pagtataguyod sa pagkilala sa karapatang ang “Edukasyon ay para sa lahat”. . Kaya ito ang repleksiyon na sa ALS, may Pag-asa!.
-oOoTHE AUTHOR IS TEACHER I OF ALTERNATIVE LEARNING SYSTEM – DIVISION OF MABALACAT CITY