PAGSUSURING PELIKULA BILANG BEHIKULO NG PAGHUBOG NG MGA KASANAYAN SA PAMPANITIKANG FILIPINO
Sa kasalukuyan nililinang ang iba’t ibang pagpapahalaga sa mga mag-aaral na kabataang Pilipino. Ang mabuting pag-uugali, pagmamahalan at pag-uunawaan hindi lamang sa kapwa kundi gayundin sa bansa ay mahalagang malinang na kaugalian sa kabataang Pilipino. Naisasakatuparan ito sa pamamagitan ng paggawa ng programa tungkol sa pagbuo ng mga kahalagahang panlipunan na itinuturo ngayon bilang asignatura o iba pang disiplina.
Bukod sa asignaturang Agham Panlipunan at Araling Panlipunan na pangunahing tinatalakay sa mga isyung panlipunan ay maari rin namang ipagsanib ito sa panitikan o literatura, dahil ito ay karaniwan o madalas na tinatalakay ang buhay o dili kaya’y karanasan ng isang tao o kaya karanasan nito sa kaniyang lipunang kinabibilangan. Ang mga katangian ng damdamin, paniniwala at pag-iisip na naisasatitik ng isang malikhaing manunulat ay nailalarawan dito. Sa bawat uri o anyo ng panitikan, mababakas ang mahahalaga at magagandang katangian ng isang lahi na maaring kapulutan ng mga mahahalagang aral na magagamit ng baway indibidwal sa pagpapaunlad ng buhay.
Ang mga Pilipino ay mahilig na sa pagbabasa ng mga kwento o iba pang anyo ng panitikang may iba’t ibang tema at damdamin. Isang katangian ng panitikan na kaya nitong makisabay sa daloy ng panahon. Sa pamamagitan ng mayamang imahinasyon ng mga manunulat at alagad ng sining, ang mga akdang pampanitikan na ating unang narinig at nabasa ay maaari nang masilayan sa mas makulay at mas mataas na antas ng sining. Isang modernong anyo ng panitikan ang pelikula. Malaki ang naitutulong ng teknolohiyang ito upang mabigyan ng panibagong kulay at buhay ang mga natatanging akdang Pilipino. Isang pamamaraan upang makasunod sa pag-unlad ng makabagong teknolohiya ang mga maikling kuwento, mga katutubong epiko, alamat, talambuhay, at nobela na nagpapakita sa ating mayamang kultura at kasaysayan ay sa tulong na rin ng pagsasalinng mga akdang nakalimbag sa pelikula.
Noon pa ay hindi na maitatanggi ang malaking papel ng pelikula sa mga Pilipino. Kung tutuusin ang pelikula ay matagal nang bahagi ng kultura ng mga Pilipino. Ito ay naging salamin kung paanong naging makulay at tumingkad ang pamumuhay at paniniwala ng bawat isa. Malaki rin ang naging papel ng pelikula sa mga Pilipino dahil naipakita ang mga iba’t ibang sitwasyong kinaharap na magiging imahinasyon o nagaganap sa totoong buhay. Ang pelikula rin ang nagtataglay ng kapangyarihang maikintal sa bawat manonood ang kahalagahan ng buhay.Makatutulong ang pelikula dahil ito ay magbubukas sa ating isipan sa mga isyung panlipunan na nagaganap sa iba’t ibang panig ng ating bansa. Layunin din nitong magbigay ng aral at mensahe sa mga manonood. Malaki rin ang ginagampanan ng mga aktor at minsan ay nakikita natin ang ating sarili sa kanilang mga ginagampanan.
Sa kasaluyan ay napakarami nang mga kuwentong Pilipino na ang naisapelikula at nabigyan ng panibagong anyo upang makasabay sa popular na kultura tulad ng mga nobelang Noli Me Tangere at El Filibusterismo ni Dr. Jose Rizal na tumatalakay sa kasaysayan ng ating bansa. Sa pamamagitan ng pagsasapelikula nito malinaw na naipakita rito ang damdamin ng manunulat, ang kaisipang nais niyang maiwan sa kanyang mga mambabasa at higit sa lahat ang aral na mapupulot at magagamit ng kaniyang kliyente.
-oOoThe author is Teacher I at San Juan High School, Mexico Pampanga