Pasidaan sa mga pulitiko
ALANG sa mas limpyo, hamugaway ug luwas sa paghugawhugaw ang mga pampublikong lugar, gipahimangnoan sa anti vandalism czar sa dakbayan sa Sugbo ang mga pulitiko ug dumadapig sa di pagpataka og butang sa ilang mga campaign materials.
Ang mga kandidato nakafile na sa ilang mga Certificate of Candidacy (CoC) alang sa sunod tuig nga piniliay.
Si Atty. Clarence Paul Oaminal, kanhi vicechairman sa Dangerous Drugs Board (DDB) niawhag sa mga kandidato sa pagbadlong sa ilang mga supporter sa di pagpataka og papilit sa ilang mga hulagway ug pangan sa pader, poste, merkado, sport complex ug uban pa.
Iyang gipasabot mao ang mga kandidato sa Team Rama ni Mayor Michael Rama ug Bando Osmeña Pundok Kauswagan ni Kongresista Tomas Osmeña.
Gidasig sab niya ang mga standby o mga sakop sa fraternity ug gang sa dakbayan sa pagmintinar sa kalimpyo sa palibot pinaagi sa pagtambayayong nga di mahugawhugawan ang mga pader, poste nga maoy sagad pasiritan og pintal.
Ang kanhi vice chair sa DDB niawhag usab nilang Konsehal Jun Pe, Kapitan Jun Gabuya ug Zenaida Amores sa BOPK nga mubadlong sa ilang tigpaluyo nga di magpataka og butang sa ilang mga poster nga adunay ilang mga pangan kay hugaw kaayo tanawon sa publiko.
Gawas sa tulo ka mga pangan wa pay nakitang laing pangan si Oaminal nga iya sa mga kandidato.
Wa sab siyay nakitang mga poster o campaign materials nga iya sa Team Rama nga gipapilit sa pampublikong lugar.
Matod ni Oaminal nga way problema kon anha lang ipapilit ang mga posters sa mga pribadong balay o establisimento.
Si Oaminal ug ang Brigada Hapsay Sugbo padayon sa ilang kampanya paghinlo sa dakbayan batok sa graffiti.
Giuna nila ang mga elementary schools ug pipila ka public place sa siyudad nga napuno sa vandalism.