Maduguong fiesta
Gabii niadtong Pebrero 22, 1997, nanan-aw sila si Lando ug Mando sa mga kalingawan sa ilang kapistahan dihang niduol kanila si Tero. Aron kalikayan nga mahitabo ang kagubot, nanglikay silang duha.
Apan dunay kaguliyang nga nahitabo dihang gibunalan og bahi nila ni Tero ug Bido si Lando. Napalingkod ang biktima sa yuta, apan nakabarog ug nakadagan padung sa balay ni Karyo, ang brgy. kapitan.
Gigukod siya sa duha, apan samtang nagdagan giatangan siya ni Ramon, Karyo ug anak niining si Noel, kinsa nagdala og pito ka pulgadas nga kutsilyo. Naabtan sa lima ang biktima sa atubangan sa balay ni Karyo.
Samtang nagtagsa sa pagdala og bahi, ilang gitabangan sa pagbunal si Lando hangtod nga nahagba kini sa yuta. Gisukmag pa siya ni Karyo sa apapangig bisan nag-ubo na kini. Dihang wa na maglihok si Lando, nimando si Karyo kanila ni Bido ug Tero sa paggapos sa biktima diha sa liog, kamot ug mga tiil.
Nitaho si Cynthia, asawa ni Lando, ngadto sa kapulisan. Apan wa gi-blotter ang iyang sumbong kay nakauna diay si Karyo sa pag-report. Si Lando ang giakusahang nipusil kang Ramon, igsuon sa kapitan ug giingong buhi pa si Lando dihang gitugyan ngadto sa mga barangay tanod.
Apan si Karyo dunay lahi nga bersyon sa hitabo. Matod niya nga nagbantay sila sa kapistahan isip mga opisyal sa ilang barangay nga nagsaulog sa kapistahan. Dunay sunog sa kasilyas sa day care center nga gipawong sa mga tawo nga naassign sa dapit.
Laing kagubot ang nahitabo sa dapit nga gibantayan nji Ramon. Samtang nagsusi si Ramon, kalit lang nitumaw si Lando, niduol kang Ramon ug namusil. Naigo si Ramon sa wala nga abaga. Aron di makausab pagpusil, gibunalan ni Ramon sa iyang dala nga bahi si Lando. Naigo sa tangkugo si Lando. Mao ni ang pagbunal nga giingong gihimo nila ni Tero ug Bido.
Nibarag si Lando ngadto sa koral nga kawayan. Aron di makahimutang si Lando, gipadayon ni Ramon ang pag-atake kang Lando ginamit ang bahi. Nagsige og atras si Lando apan nakahigayon siya sa pagpusil kang Ramon, kinsa wa maigo.
Dihang niabot sa ngilit sa dan si Lando, natumba kini. NIabot si Tero ug gimandoan si Ramon sa paghunong sa pagbunal, apan gisultihan niya si Tero nga naa pa ang pusil kang Lando.
Mamusil na sab unta si Lando, apan nahapak ni Ramon ang kamot ug nalabay ang pusil sa nahimutangan ni Joe, kinsa mao nay nagkupot sa pusil. Gimandoan siya ni Karyo nga taguan ang pusil.
Si Ramon nga samdan gidala sa lungsod ug gipatambalan sa ospital. Sila si Karyo ug Tero ningtaho sa kapulisan. Si Bido, sa iyang bahin, maoy nigapos og pisi kang Lando kay wa silay magamit nga posas.
Niabot ang mga pulis nianang buntag ug gihatag ni Joe kanila ang armas ni Lando. Patay na si Lando dihang niabot ang mga pulis. Dunay nakuhang usa ka slug si Noel nga iyang gihatag sa mga pulis.
Kinsa man kaha ang nagsulti sa tinuod, ang prosekusyon o ang depensa nga gilangkuban sa mga barangay official? Sad-an ba sila sa kamatayon ni Lando? Unsa man sab nga kaso?