Girlfriend, boyfriend

Dear Noy Kulas

Tawga ko sa ngalang Kurt, 22, gaeskwela sa usa ka unibersidad. Naa koy uyab nga mga mo 2 years na unta mi hapit. Nagkaila mi sa usa ka department store diin siya nagtrabaho isip sales

lady. Grabe kaayo ang akong kaibog ani niya busa nangaplay ko sa ilang tindahan. Buenas kay gitawagan ko dayon after two

weeks mao nga nagkauban mi. Daku akong kalipay kay abi nako og but-an siya, apan sipyat ko kay nagkadugay, nagkagrabe sad iyang kaselosa ug maldita kaayo. Niundang ko kay moeskwela ko og tiwas sa akong kurso.

Adtong July, acquaintance party namo apan tungod sa kaselosa niya, giaway ko niya kay di ta ko niya paadtuon sa party apan tungod sa kalagot nako, niadto gyud ko. Niadtong gabhiuna, nikuyog ko sa akong mga classmate diin nako naila-ila ang usa ka bayot nga amigo sa akong kauban. Nagkasinabtanay mi ug nagkauyab. Iya man gud ihatag ang tanan nakong gikinahanglan. Almost five months na sad mi ni Red apan ako siyang gisultihan nga naa koy uyab nga babaye aron di ko masakitan. Apan ang akong uyab nga babaye wa nako pahibaw-a. Grabe kaayo ang iyang pag-ander nako. Nisamot nga wa na ko ganahi niya mao nga ako siyang gibuwagan apan wa mosugot.

Karon gusto si Red nga mogasto nako sa akong pagtungha karong second sem. Wa na koy panggasto sa pag-eskwela. Na- hadlok ko kay basin di na ko kagawas niya. Unsa may akong buhaton, Noy Kulas? Si Red nahigugma og maayo nako ug nahibaw-an ra ba nako sa iyang mama nga duna siyay sakit sa kasingkasing. Mobiya na unta ko niya kay basin mahibaw-an niya nga wa koy gusto niya.

Please tambagi ko, Noy Kulas.

KURT Kurt,

Nganong di man nimo prangkahan ang duha kon unsay naa sa imong dughan? Magpabilanggo ka diay nianang inyong relasyon tungod lang kay maluoy ka nilang masakitan kon imo ning buhaton? Isakripisyo mo lang ba ang imong kalipay kay nahadlok kang masakitan sila? Kay kon imo nang buhaton, sama ra sab silang imong gitunto, apil na ang imong kaugalingon. Unya ang ending mao lang gihapon, magkabuwag mo in the future kay kon way gugma ang usa, kagubot ra ang sangkuan niana.

Ayaw dawata nang tanyag ni Red kay kanang imong kahadlok seguradong mahitabo gyud na kon imong dawaton ang iyang tanyag. Mogasto siya nimo tungod sa iyang gugma diha nimo and in

return, iya ka na. Mag-ilaray mo sa usag usa. Siya nag-ilad sa iyang kaugalingon nga nahigugma ka niya samtang ikaw nagpatuo nga may pagbati ka kaniya.

Lalin og lugar. Palayo diha. Pangita lang og lusot. Mopauli ka sa inyoha sa Negros aron makalikay ka. Mahimong mopasangil kang mobakasyon apan di ka na mobalik pa. Kana di kaayo grabe ang

impact. Mas sakit hinuon ang moprangka ka. Huna-hunaag maayo. Pag-ampo sab aron malamdagan ka sa Ginuo ug hatagan og kaisog aron ka mobarog alang sa imong kaugalingon. Alang ra sab na sa kaayuhan ninyong tulo sa umaabot.

NOY KULAS