To love is to let go

SAYO

pa gani ang gabii naandam na sa among katabang ang lamiang mga sud-an. Nakaligo na sab ko. Nagbutang ko og mahalong perfume sa akong lawas. Nangalisbo ang kahumot sa tibuok kong lawas. Nagsul-ob kog miniskirt. Milutaw pag-ayo ang akong kaguwapa ug kaseksi. Siguradong matental ko si Edgar. Wa pay alas siyete dihang nahiabot si Edgar. Misamot siya kaguwapo sa gisul-ob niyang light red nga tisirt nga giparesan sa karsones nga maong. Milutaw ang iyang kaputi.

“Adto na ta sa kumedor, Ed.” Paraygon ang akong tingog ug gituyo nga madikit ang akong lawas sa iyahang lawas aron masingo niya ang akong kahumot. “Sige. Gigutom na sab ko.” Malipayon si Edgar. Mikupot ko sa iyang bukton. Ug samtang nanihapon kami, way hunong ang pagpahiyom ko sa akong boyfriend. Nagtupad kamig lingkod.

“Ayaw og pauli dayon, ha Ed. Laay kaayo kon wa koy ikaestorya.” Misamot kaparaygon ang akong tingog. “Gusto ko nga mag-estorya tag dugay.” “Aw, kana ra diay. Sure kaayo.” Pagkahuman namog kaon, nanglingkod kami ni Edgar sa sala. Nagpagawas kog Red Wine ug duha ka baso. Giingnan ko ang among katabang nga kon makahuman na siyag panghipos sa among kinan-an ug makahuman na sab siyag kaon, mopahuway na siya sa iyang kuwarto. “Basig mahubog ta ani, Malou.” “Gamay ra gud ang atong imnon, Ed. Gawas pa, di man ni makahubog kay Red Wine man.” Midip-ig ko pag-ayo sa akong boyfriend. Nagtupad kamig lingkod sa taas nga sopa.

Bisag Ladies drink ang among giinom, pero nanginit gyud ang akong mga dalunggan. Medyo nalipong na sab ko. Ubay-ubay na ang among nainom ni Edgar.

“Anhi katulog, Ed. Sa akong kuwarto.” Gipisil ko ang lamurok nga aping sa akong boyfriend. Gipaduol ko pag-ayo ang akong nawong sa mga ngabil ni Edgar. “M-Malou!” Wa na ko makapugong, ako ang unang mihawok kang Edgar. Gihagkan ko siya sa mga ngabil. Nakapiyong ko. Migakos kog hugot sa akong boyfriend. Naghuwat ko nga mogakos sab si Edgar nako. Naghuwat ko nga mobawos siya sa paghawok sa akong mga ngabil.

Nalipay ko kay iyang gikuptan ang duha ko ka mga abaga.