NALIPAT, NABANGGA; 2 NAMATAY
Driver sa PUJ wa kabantay sa trak nga gi-park daplin sa karsada
|
WA dayon siya makabantay sa trak nga naghunong daplin sa karsada hinungdan nga siya nabangga sa miaging gabii nga gikamatyan sa duha ka mga pasahero ug niangol og 16.
Mao kini ang pagpasabot ni Edelmar Alister, 29, ulitawo, taga Brgy. Cantabaco, dakbayan sa Toledo, driver sa PUJ (GVT 396) nga nabangga sa tenwheeler dumptruck (LDY 703) nga gimaneho ni Junzel Labajo,21, minyo, taga Brgy. Jaclupan, dakbayan sa Talisay.
Si Labajo nanihapon niadtong higayuna sa usa ka tindahan sa Brgy. San Juan Climaco (kanhi Magdugo) mga alas 7 pasado sa gabii niadtong Biyernes dihang nahitabo ang aksidente.
Mga biktimang nangamatay giila sa kapulisan nga mao sila si Rose Mary Bangkok, 44, minyo, taga Don Andres Soriano (DAS), dakbayan sa Toledo ug si Laarni Pistaho, 24, dalaga, taga DAS.
Samtang ang nangaangol giilang mao sila si Noel Lascuña, 30, minyo, DAS; Danline Natad, 22, minyo, taga DAS; Beverly Sellote, 19, taga Barangay Cantabaco; Jose Respaso, 44, minyo, taga Barangay Poog, Toledo City; Glaiza Vei Abastas, 23, dalaga, taga DAS; Jenalyn Segarra, 22, dalaga; Melinla Labajo, 35, minyo, taga Barangay Poog; Wilma Garcia, 21, minyo, taga DAS; Jerry Joey Alon, 31, minyo, taga Barangay MediaOnse; Jose Isias Abarquez, 20, ulitawo, taga Barangay Poog; Manilyn Enghong, 19, dalaga, taga Barangay MediaOnse; Jeffrey Pag- sacala, 39, minyo, taga Barangay Poog; Efren Engaling, 52, minyo, taga Barangay San Juan Climaco; Annabelle Rabillas, 32, minyo, taga Media Onse; Josephine Eborda, 35, minyo, taga Barangay Media Onse; ug Renzo Labajo, 13, taga Brgy. San Juan Climaco.
Sa imbestigasyon ni SPO2 Lorenso Mahilum, imbestigador sa traffic police sa Toledo, ang PUJ maoy nibangga sa giparking nga teen wheeler dump truck.
Matod niya nga nanihapon ang driver sa dump truck nga puno sa bas ug graba nga dadon unta paingon sa dakbayan sa Sugbo.
Ang PUJ nga gimaniho ni Alister gikan sab sa terminal sa dakbayan sa Toledo nga puno sa pasahero nga paingon unta sa DAS.
Si Alister wa makabantay sa gipark nga dump truck hinungdan sa kakusog sa impact ug maayong pagkapiyapi sa atop sa PUJ hinungdan sa kamatayon sa duha ka mga pasahero.
Ang mga biktima gidali sa pagdala sa tambalanan sa dakbayan sa Toledo, samtang ang uban gibalhin sa Vicente Sotto Memorial Medical Center.
Kagahapon sa buntag ang driver sa dump truck girelease sa kapulisan sa dakbayan sa Toledo samtang si Alister gitanggong samtang gihikay ang tukmang kasong ipasaka batok kaniya.
Si Alister nga nahinabi sa Sun.Star Superbalita niingon nga wa siya makabantay sa dump truck tungod kay yamog kaayo niadtong higayuna gumikan sa pagsigig uwanuwan.
Gawas sab niini, basa ang karsada ingon man ngitngit usab kaayo ang maong dapit.
Giklaro niya nga di kusog ang iyang dagan ug disgrasya lang gyud kini sanglit siya mismo nagamping sa mga pasahero.
Sumala pa niya nga nalipat siya ug wa dayon makakita sa dump truck kay duna siyay gikasugat nga dakong sakyanan nga hayag kaayo ang suga.
Nimenor siya sa pagpadagan ingon man nipalow sa siga sa iyang suga dayon gibalik niya pagpa high.
Apan sa iyang pagbalik sa pagpalow sa siga ug nisaylo ang gikasugat nga sakyanan, gipahigh niyag balik ang iyang suga ug nakurat na lang siya kay diha na sa iyang atubangan ang lubot sa dump truck.
Matod niya uwahi nakaayo ug wa na madalag brake ug nipilit siya sa frontseat sa iyang sakyanan.
Siya niingon nga di siya hubog sanglit dili gyud siya moinom kon magbiyahe.
Gani negatibo sab siya sa liquor test samtang gipanghimakak niya nga usa siya ka drug addict.
“Nangayo gyud kog pasaylo sa mga pamilya sa pasaherong namatay ug naangol, Sir, kay ako nagamping pud tawon ko sa pagmahino.Disgrasya gyud ang hitabao,” dugang ni Alister.
Ang iyang amahan ingon man iyang igsuon miasikaso sa mga pami- lya sa nangamatay ingon man nangaangol ug di nila pasagdan.
Andam niyang atubangon ang maong kaso sanglit nahitabo naman kini.
‘Magsaulog ko sa Sinulog sulod sa selda human ning hitabo nga kanunay man unta ko nga mamista señor sa dakbayan sa Sugbu matag tuig,” dugang ni Alister.
Matod niya nga siya gikontrata matag Sinulog sa mopakyaw kaniya hinungdan nga makaSinulog siya.