MAGUIKAY FLYOVER SIRHAN SA ENERO 24

ANG Department of Public Works and Highways (DPWH) 7 mosira na usab sa flyover sa Barangay Maguikay, dakbayan sa Mandaue sa Enero 24 ngadto na sa Pebrero 3 aron ayuhon ang expansion joints niini.

Hinuon giklaro sa kadagkuan sa DPWH7 nga ang pagsira ipahigayon sa alas 9 sa gabii hangtod na sa alas 5 sa buntag ug alas 8 sa gabii hangtod sa 6 sa buntag karong Enero 26 hangtod na sa Enero 27.

Gikan sa Enero 28 hangtod na sa Pebrero 1, ang flyover siradan gikan sa alas 9 sa gabii hangtod na sa alas 5 sa buntag ug alas 8: sa gabii hangtod sa alas 6 sa buntag karong Pebrero 2 hangtod na sa Pebrero 3.

Gawas sa pagayo sa expansion joints, mokuha usab sila sa dilapi- dated asphalt pavement ug ilisan og bagong aspalto.

Ang pangulo sa Traffic Enforcement Agency of Mandaue, Edwin Ermac, niingon nga ang mga motorista mahimong makaagi ubos sa flyover.

Apan ilang gidasig ang mga motorista nga kon mahimo moagi og laing karsada sama sa Ouano Ave. ug Plaridel st. aron makalikay sa grabeng kahuot sa trapiko sa maong lugar sa higayon nga ayuhon na ang flyover.

Hinuon, nagtuo si Ermac nga di kaayo kini makaapekto sa trapiko sanglit sa oras nga ilang isira di man usab kaayo daghan ang mga sakyanan nga moagi.

“Dili ra kaayo ta magkaproblema kay gabii man. Inig buntag, iopen ra man ang two lanes,” matod ni Ermac.

Hinuon iyang gipasalig nga mobutang silag daghang traffic enforcer sa maong mga adlaw.

Kahinumdoman, ang DPWH 7 6th Engineering District niayo na usab sa expansion joints sa flyover sa Barangay Subangdaku niadtong Enero 13 ug 14.