2.7 milyunes ming-apil sa prosesyon: kapulisan

NIABOT og 2.7 milyones sa bagang duot sa katawhan ang gibanabana nga niuban ug nisaksi sa gipahigayon nga solemn foot procession sa kapistahan ni Sr. Sto. Niño kagahapon sa hapon sa dakbayan sa Sugbo.

Si P/Sr. Supt. Mariano Natuel, officer-incharge sa Cebu City Police Office (CCPO) nga nahinabi sa

Sun.Star Superbalita mibanabana sa gidaghanon sa mga tawo nga mas daghan og dul-an usa ka milyon kon itandi sa miaging tuig.

Iyang gihulagway nga generally peacefully ang kalihukan sukad sa pagsugod hangtud na sa pagtapos diin nag-abot ang pangunahan ug ikog sa procession.

Nahunong og pipila ka higayon ang paglihok sa prosesyon sud sa 5.7 kilometro nga rota dihang nisuksok sa panon sa mga tawo ang ubang mga deboto nga nagpaabot kilid sa kadalanan labi na dapit sa Osmeña Boulevard ug Fuente Osmeña ning siyudad.

Si Cebu Archbishop Jose Palma wa makauban sa procession kay dili siya makalakaw og layo nga distansiya.

Sa giandam nga programa sa basilica, magsugod ang solemn procession ala 1:30 sa hapon apan gisugdan kini alas 12:52 pa lang sa udto, pipila ka oras human sa fluvial procession sa buntag.

Sa wala pa sugdi ang prosesyon, gipahigayon una ang ceremonial turnover of command tali sa duha ka mga imahen sa Sto. Niño, ang usa gikan sa basilica samtang ang laing usa gi- kan sa San Nicolas parish.

Ang imahen nga gikan sa basilica gidiklarar nga Kapitan Heneral samtang ang gikan sa San Nicolas ang nagdala sa ranggo nga “Teniente General”.

Ang turnover of command, gipangulohan ni Padre Jonas Mejares, rector ug nagrepresentar sa basilica samtang si Msgr. Trinidad Silva ang nagrepresentar sa San Nicolas.

Ang maong seremonya nagpasabot nga samtang iprosesyon ang Kapitan Heneral libot sa siyudad, mo-takeover ang Teniente General nga gikan sa San Nicolas aron maoy mobantay sa Basilica.

Alas 6:05 sa gabii, gibanabana nga naabot ang karo nga giluwanan sa imahen sa Sr. Sto. Niño sa basilica nga hugot nga gi-escortan sa kapulisan, militar ug mga tinun-an sa kolehiyo.

Si Natuel nibutyag nga niabot og 500 ka mga pulis ang gipakatap ug nipatunhay sa kahapsay ug kalinaw samtang nagpadayon ang relihiyusong kalihukan. Wala pay labot niini ang mga support group sama sa militar, barangay tanod, mga tinunan sa kolehiyo ug ubang civilian volunteers.

Makaduha usab naigo og brownout ang pilgrim center sa basilica ug silingang mga establishemento.

Samtang upat ka mga mangunguot ang buwag nga nangadakpan sa kapulisan sa Waterfront Police Station sa CCPO.

Ang panahon niduyog usab sa ka solemne sa procession tungod kay dili init ang sinag sa adlaw sa pagsugod apan pipila ka metros na lang sa dili pa moabot ang imahen sa Milagrusong Bata sa basilica, niuwan og makadiyot nga nakapabungkag sa ubang mga deboto nga nagpaabot kilid sa dalan sa paglabay sa imahen.