Mga kausaban naobserbahan

PIPILA ka mga kausaban ang namatikdan sa mga deboto nga nisaksi sa gipahigayon nga tinuig nga fluvial procession kagahapon, besperas sa kapistahan ni Sr. Sto. Niño.

Si Cebu Coast Guard Station Commander Capt. Rolando Punzalan nihulagway nga nagmalampuson ug way insidente nga nahitabo samtang nagpadayon ang kalihukan.

“It was satisfactory,” pahayag niini dihang nahinabi sa Sun.Star

Superbalita.

Atol sa procession, dunay 65 ka mga sakyanan sa kadagatan, 60 ka marshal sea crafts ug 25 ka unregistered vessels ang nisalmot.

Ang fluvial gisugdan og sayo dihang ang mv Trinidad, ang galleon nga giluwanan sa mga imahe sa Our Lady of Guadalupe ug Sr. Sto. Niño nibiya sa Ouano Wharf, dakbayan sa Sugbo alas 6:15 sa buntag sukwahi sa miaging tuig nga alas 7:00 sa buntag na nakabiya.

Ang duha ka mga imahen nagovernight sa National Shrine sa St. Joseph Parish, Mandaue City human sa Traslacion niadtong Biyernes sa wala pa gibalhin sa galleon nga gidayandayan og mga buwak.

Gikan sa St. Joseph, wala na mohapit ang prosesyon sa residensiya sa mga Ouano nga maoy nabatasan kaniadto aron dili malangay ang fluvial parade.

Daw sa usa ka tinuod nga galleon niadtong panahon dihang niabot si Ferdinand Magellan ug kaubanan sa Sugbo, ang galleon nga giluwanan sa duha ka imahen sakay ang mga lalaki nga nagsul-ob og sama sa mga sundawo nga mga Katsila.

Gikan sa Ouano Wharf, ang galleon nilabay sa Muelle Osmeña paingon sa karaang Mactan Bridge dayon lahos na sa siyudad sa Sugbo.

Alas 7:30 sa buntag naabot ang galleon sa pier 1, ning dakbayan kauban si Cebu Archbishop Jose Palma ug kaparian sa Augustinian community diin gisugat sila og libuan ka mga deboto nga nikawaykaway sa ilang mga kamot dala ang ilang tagsa-tagsa ka imahen sa Milagrusong Bata samtang ang uban nipalupad og mga balloon.