Ika-11 nga patay sa bangga sa bus ug trailer, nailhan na

USA ka tindero og sweetcorn nga ika-11 nga patay sa panagbangga tali sa trailer truck ug sa BT Trans bus niadtong Miyerkules sa hapon sa Barangay Uling sa dakbayan sa Naga, giila na sa iyang kabanay kagahapon.

Ang kataposang biktima nga si Valeriano Purisima, 52, taga Ba- rangay Casoy, dakbayan sa Toledo. Giila siya sa iyang anak nga si Adie.

Si Valeriano magbaligyaan og sweetcorn sa lungsod sa Minglanilla ug hapon na nga mopauli sa Toledo ug nakasakay diay si Valeriano sa BT Trans bus niadtong higayona.

Apan nawagtang na ang P1,000 nga halin sa namatay nga gituohang gikuha sa mga tawo nga unang nitapok human sa aksidente.

Nagtuo si Aldie nga gihimulbulan sa mga tawo ang ubang mga pasahero tungod kay daghan man ang nanapok dayon sa nagkabangga nga sakyanan.

Wa masayod ang pamilyang Purisima nga nakasakay diay sa nadisgrasya nga bus ang ilang padre de pamilya.

Tungod kay wa naman kini mauli, nabalaka na ang pamilya hinungdan nga gisuwayan na lang nila sa pagsusi ang St. Francis Funeral Homes ug didto positibo nila kining giila.