Pista Señor
SA mga kalihukan nga relihiyuso samtang nag-angat ang kapistahan ni Sr. Sto Nino, liboan ka mga deboto ang nangapil, nagsakripisyo sa pagtambong sa siyam ka adlaw nga novena.
Dunay ningmata og kaadlawon aron pag-apil sa Walk with Jesus ug Walk with Mary. Dunay ning-agwanta sa kainit aron mosaksi sa Traslacion, mingbaktas alang sa Solemn Procession.
Nagkadaghan ang nangapil sa mao nga mga kalihukan kada tuig. Kini taliwa sa mga kalisdanan nga giatubang sa katawhan sama sa tumang kakabos, hulga sa mga katalagman, mga sakit sa katilingban sama sa drugas ug mga hulga sa pamilya.
Sa panahon karon, daghan ang nangaliya ug nanagsandig sa ilang mga problema ngadto kang Sr. Santo Nino ug kang Birhen Maria.
Busa, kinsa ang nag-ingon nga nagkagamay ug nagkahilis ang pagtuo sa katawhan ngadto sa Diyos? Ang nagkadaghan nga bagang duot sa katawhan usa ka maayong tilimad-on alang sa Simbahan. Bisan sa krisis nga giatubang niini, nagpabilin diay sa panon ang daghang mga karnero.
Wa diay mangahisalaag sa laing dalan ang katawhan.
Karong adlawa, taliwa sa kaalingisig ug kahagipot sa kadalanan tungod sa bagang duot sa katawhan nga mangapil sa grand parade, di maayong hikalimtan ang tinud-anay nga kasaulogan, ang kapistahan ni Sr. Sto. Nino.
Pit Senyor!