Lahi nga milagro sa Senyor
BUTA ang duha ka mga mata ni Marta. Dili siya makakita sa kahayag sa bidlisiw sa bagong misubang nga adlaw sa ilang dapit sa bukid sa sityo Mangabon. Sa ibabaw sa bungtod may gamayng patag diin nahimutang ang gamay nilang payag. Nadunggan niya si nanay niya Magna nga mideskrayb kaniya sa matahom nga talanawon.
“Day Marta, gilantaw nako karon gikan ning atong nahimutangan ang mga matahom nga talanawon, ang mga dapit nga atong mga silingan ning mamingaw nga kabukiran. Klaro kaayo sa akong mga mata ang barangay Adlawon, Guba, Cambinukot, Lusaran ug uban pa,” asoy ni nanay niya Magna.
“Nay Magna, kaanindot unta kon makakita pa unta ko. Apan dili ko makakita sa tanan mong nakitan karon. Ngitngit kining kalibutan kong gipuyan, sama sa akong pagpuyo sulod sa siyam ka bulan diha ilawom sa imong tiyan,” ni Marta.
Si Marta nahimong usa ka maguuma dinhi sa bukid nga way kaabag nga bana. Siya usa ka dancer ug GRO kun guest relation officer kaniadto sa usa ka beerhouse. Matahom siya ug wala makalikay sa daghang mga tentasyon. Gikatugyan niya kang Emmanuel ang kaputli sa iyang pagkababaye. Si Marta ang bunga sa ilang gugma. Mipauli siya dinhi sa bukid dihang gimabdos niya si Marta. Sanglit ilo nga tuwapos si Magna giantos niya ang pagpuyo nga maginusara sa iyang payag. Sumala pa sa iyang kahigalaan nga mga dancer ug GRO, nga miduaw kaniya dihang gipanganak niya si Marta, diyes sentabos lang ang plete gikan dinhi paingon sa langit.
Sa kinasingkasing nga nagampo si Magna kang Senyor Sto. Niño nga makakita na si Marta. Sigon god sa doktor nga ilang gikonsultahan sa miaging tuig, may purohan nga makakita si Marta, apan kinahanglan ikonsulta sa espisyalista sa mata ug dakong kantidad. Ang giampo ni Magna mao ang milagro sa Senyor maoy moayo sa mga mata ni Marta. Gani nagplano siya nga dadon ang anak sa Basilica del Sto. Niño ug magsinulog didto.
PAGKA sunod adlaw kalit nga mitumaw si Emmanuel sa bukid. Usa ka milagro kini alang kang Magna.
“Magna, ania ako aron pagkuha kaninyo ni Marta, “matod ni Emmanuel. “May kuwarta ko sa banko nga ikagasto alang sa operasyon sa mga mata sa atong anak. Mangita kitag espisyalista sa mata nga doktor.”
“NNay. Kkinsa kanang tawhana nga imong gikaestorya? Iimo ba siyang higala? Nganong nia siya karon? Unsay iyang tuyo?” nagpusotpusot ang mga pangutana ni Marta nga midapuwas sa iyang mga kamot sa buta niyang mga mata.
“DDay MMarta, siya si Emmanuel, ang tinuod mong amahan. Gikuha kita niya aron kaoperahan sa doktor ang mga buta mong mga mata,” tubag ni Marta nga migakos sa hawak ni Emmanuel.
“Tinuod kana, Day Marta. Gikan pa ko sa Amerika. Nageskuyla ko didto sa medisina. Busa, mangayo kog pasaylo kaninyo ni nanay mo sa akong sala pagbiya kaninyo.” Naghilak si Emmanuel nga migakos kang Marta.
“Mahal nga Senyor Santo Niño, daghang salamat kanimo, kay sila si Nanay ug Tatay ko sa gugma gihiusa pagbalik kanimo,” misulti si Marta nga nagkatawa. “Pit Senyor! Viva Sto. Niño!”
Sa iyang bahin, si Magna nagpasalamat sa Balaang Bata sa milagro niini kanila ni Marta nga mao ang paghibalik ni Emmanuel sa ilang kinabuhi, bisan kini nalahi nga milagro.