Bike lane

Sa miaging tuig, inay nga mosagol mi sa katawhan nga nangapil ug ningsaksi sa Sinulog grand parade, kaming mga forum

member sa Cebu Cycling nanag-abot sa IT Park sayo kaayo sa buntag. Di mominos 56 ka mga biking enthusiast ang nanagtapok. Nagdungan mi sa pagsaka sa kabukiran sa dakbayan sa Sugbo.

Bisan tuod sa Talamban-Pit-os mi nangagi, kaming mga taga Bacayan nangadto sa IT Park kay mas nindot ang mokuyog sa panon. Mga alas 7 sa buntag nagsugod mi og sikad, among rumbo ang Ayala Heights, apan didto mi misaka sa Brgy. Binaliw kay mas uga ang yuta itandi sa Pulangbato.

Nangahibung ang mga tawo nga among naagian tungod sa among kadaghan nga nanungas. Ang uban kutob ra gyud hinuon sa Brgy. Guba tungod kay duna pa silay mga lakaw samtang ang nangahabilin mipadayon sa rumbo. Mga ala 1 pasado sa hapon diha na mi sa Buak. Karong adlawa, daghan na sab ang mga biker nga mapaabot nga manungas aron mopahimus sa higayon nga makapasingot. Daghan namo ang samukan ug kapuyan nga moapil sa tapok sa bagang duot sa katawhan.

Apan karong tuiga, moapil ko sa duotduot for a change. Naa may daghan pang mga adlaw alang sa akong pagsikad.

Bike lane

Nalipay kaayo ko nga niirog ang among

giduso nga bike lane dinhi sa dakbayan sa Sugbo. Hilom diay nga gikombinser ni Konsehal Nida Cabrera ang iyang mga kauban nga suportahan kining mao nga tinguha. Sayo sa

miaging tuig, kuyog mi ni Mam Nida ug Tony Dimataga sa Cebu Extreme, grupo sa mga

biker nga hilig sa trail ride, sa pagsusi sa mga karsada nga posibleng unang mabutangan

og bike lane.

Naghangyo ang Cebu City Council sa Department of Public Works and Highways (DPWH) ug Department of Transportation and Communication (DOTC) sa pagtuon sa pagbutang og bike lane sa pipila ka piniling mga karsada sa dakbayan, apil na sa Brgy. Busay padung sa Brgy. Malobog ug Pung-ol Sibugay.

Kami mismo nga mga biker nasayod nga di tanang bahin niini mabutangan og bike lanes tungod sa kahagip-ot. Dunay mga bahin sa karsada nga gikinahanglang palapdan alang niini. Apan wa man sab kinahanglana ang dakong

bike lanes kay mahimo ra man nga mga one meter lang ang gilapdon niini. Busa, wa na kinahanglana nga palapdan pa ang mga karsada una butangan og

bike lanes ang dakbayan sa Sugbo. Ang dagkong mga siyudad sa Metro Manila wa magpalapad sa ilang mga karsada sa ilang pagbutang og bike lanes.

Sa wa pa sila magbutang og bike lanes, ang mao nga mga siyudad nipahigayon og

technical study. Nagpasar usab sila og mga ordinansahon nga magdasig sa mga tawo sa pagbiseklita. Kita dinhi sa dakbayan sa Sugbo nga nagsige

og panghambog nga queen city of the south, nabiyaan

ning `green project.’

Magpasalamat ta nga dunay konsehal nga visionary nga di lang kutob sa pagarpar sama sa ubang mga pulitiko. Naglantaw siya og mga kausaban alang sa kaayuhan sa umaabot nga mga henerasyon.

Maayo unta kon iduso gyud kini sa atong mga opisyal sa siyudad bisan unsa pa ang lakat sa pulitika. Alang ni sa katawhang Sugboanon, di lang kay sa mga pulitikong dagko og tiyan.

Nahuman Basin nakabantay mo sa lumba sa mga

road cyclist sa mga siyudad ug kalungsoran sa Sugbo. Mao to ang Ronda Pilipinas sa LBC. Ang stage 4 gipahigayon niadtong Huwebes samtang ang stage 5 niadtong Biyernes.

Ang stage 5 maoy labing lisod kay nisulod sila balik sa dakbayan sa Sugbo agi sa Balamban ug nikatkat sa Transcentral Highway. Ingon pang Allan Defensor, among

photographer nga gipakuyog sa LBC, dunay mga siklistang namalikas di tungod sa kasuko, kon di sa kakapoy. Sa mga stages, ang stage 5 maoy labing hait nilang gisaka.

Ingon pang Allan, nahigmata sila nga di sayon ang mga karsada sa kabukiran Sugbo sa mga siklista, bisan niadtong mga beterano na kaayo.