Always forever
(Ikaduha sa pito ka mga gula)
BISAG nag-edad na kog desinuybe pero wa pa gyud ko makasuway og pagpakigrelasyon og opposite sex. Nuon, dunay mga nangulitawo nako kaniadto labi na sa akong high school days pero wa ko sila tagda. Maong naglisod ko karon pagtugkad sa akong pagbati kon in-love ba ko nila kang Adrian ug kang Jonar. Ug kon gugma man gani kining akong gibati karon, pero para kang kinsa man? Kang Adrian ba o kang Jonar? Kinahanglang masuta gyud nako sa akong kaugalingon kon unsa ang tinuod kong gibati kang Adrian ug Jonar una ko mopakanaog og desisyon. “Medyo nagkalawom na man ang gabii, Fe. Mopauli na ko.” Mitindog si Adrian. Mitindog sab ko. Nagpahiyom ko. Di ko gusto nga mopauli sa Adrian nga magul-anon. “Ayaw og guul-guol, uy. Wa kay angay ana.” Mikatawa ko. “Bitaw, da. Wa pa gani ko masayod sa imong desisyon, nagpada’a na ko sa akong pagtuo nga pakyason ko nimo.”
“Korek ka ana, Adrian. Wa pa gani ko makahukom. Pero wa tika tagaig paglaom ha. Ang ako ba, kon unsa man ang akong desisyon, dawaton nimo ni sa kinasingkasing. Di ba mao man ni ang inyong gkasabotan ni Jonar?”
Mipahiyom na si Adrian. Gihatod ko siya sa pultahan sa sala. Unya, natulog na ko.
Pagka ugma sa gabii, si Jonar na sab ang namisita nako. Ang gisulti ko kang Adrian mao sab ang akong gisulti niya.
“Ay, oo, uy. Maghuwat ko sa imong desisyon. I will respect your decision. Kon si Adrian ang imong sugton, sakit kaayo ni nako, uy, kay true love man ka nako.” Miyangu-yango ko. “Pero dawaton ko ni, Fe. Kinasingkasing nga pagdawat.” “Sports gyud ka diay nga pagka lake, Jonar.” Nalipay ko sa akong nadungog kang Jonar. “Yes! Ingon ko ana, Fe.” Wa ko makita sa nawong ni Jonar ang kaguol. Dasig siya. Ingon ani si Jonar. Madasigon kanunay. Morag way problema. Ug kon duna may problema, pero makamaong modalag problema. Ug ako madala sa iyang kamalipayon. Kanunay kong dasig kon si Jonar ang akong ikasulti.
Samtang si Adrian, kanunay seryuso. Parehas nga gwapo si Adrian ug Jonar pero duna silay lain-laing kinaiya nga akong basehan sa pagdesisyon.