Soco miduaw sa isla sa Camotes

GIDUAW ni Magpapatigayon Glenn Soco ang tulo ka mga lungsod sa Isla sa Camotes aron pagkuha sa sentimento sa katawhan ilabi na gayud sa nagsingabot na ang piniliay.

Wala usab magdahom si Soco nga nagpapili karon pagka bise gobernador sa umaabot nga piniliay sa mainition nga pagdawat kaniya sa mga katawhan sa lungsod sa San Francisco, Poro ug Tudela.

“Nalipay gayud ang katawhan sa isla diha sa mga Purok nga unang giduaw sa usa ka kandidato sa probinsya,” pamahayag ni Luciano Arias kanhi konsehal sa lungsod sa San Francisco.

Matud pa ni Arias nga nakita ug nadungog gayud sa katawhan ang mga maayong hunahuna ni Soco ilabi na gayud kabahin sa maayong giya sa negosyo.

Gawas sa pagduaw sa mga puroks si Soco nakigtagbo usab sa mga tinun-an sa Cebu Technological University sa lungsod sa San Fracisco ingon man sa Mt.Moriah College sa lungsod sa Poro.

Mihatag si Soco sa hustong giya ngadto sa mga tinun-an ilabi na gayud kon sila gusto na nga mangita ug trabaho o ba kaha mupadagan sa ilang kaugalingon nga negosyo.

Gihimo niyang sanglitanan ang iyang pagsugod sa Coffee Dream niadtong tuig 1995 nga usa lamang ka payong-payong karon aduna nay 42 ka sanga sa tibuok nasod.

Nakigtagbo usab si Soco sa mga kababayen-an ug senior citizens diin iyang gipahibawo ang iyang plano kabahin sa mga livelihood projects ug ayuda sa mga senior citizens.

Nahibawo usab siya sa sitwasyon sa sugang dagitabnon sa tibuok isla gikan sa Camotes Electric Cooperative Inc. nga nagbase sa lungsod sa Poro.

Miduaw usab si Soco sa mga munisipyo sa tulo ka lungsod diin mainiton siya nga gidawat sa mga opisyal ug empleyado niini.

Giduaw usab ni Soco ang tabo sa lungsod sa Poro ug Tudela diin iyang gikahimamat ang mga manindahay ug mamalitay nga nakakita gayud kaniya.

Gipasabot ni Soco nga isip usa ka negosyante mubati gayud siya sa mga gagmayng mga magpapatigayon nga iya usab gigikanan.

“Sa akong pagbisita sa Camotes daghan kaayo kita ug mga nadawat nga sugyot gikan sa katawhan nga makahatag kanato ug dakong giya sa umaabot nga mga adlaw” pamahayag ni Soco.