Pacquiao, Talk ‘N Text

WA magkatukma kining mga plano karon ni Manny Pacquiao ug sa iyang promoter nga si Bob Arum.

Gusto ni Pacquiao nga moaway na og balik karong Abril ug gani iya na karong gimandoan ang iyang adviser nga si Michael Koncz sa pagpangita og dapit asa mapahigayon ang away.

Target nila mao ang Singapore, Dubai o kaha sa Macau. Apan kon di man gyud gani available ang maong mga lugar, gilantawan karon sa kampo ni Pacquiao ang Rizal Memorial Stadium sa Manila.

Kon madayon, kini maoy magsilbing tune up fight ni Pacquiao sa di pa siya makigsangka og balik ni Juan Manuel Marquez sa ikalimang higayon.

Anhi usab ning awaya, maobserbahan kon wa ba makaapekto ni Pacquiao ang iyang sixth round knockout sa niaging buwan sa ilang away ni Marquez.

Pero si Bob Arum, ang president sa Top Rank Promotions, di gusto nga moaway pa si Pacquiao sa Abril kay wa na kini kinahanglana pa.

Gusto ni Arum nga mopahuway og hataas si Pacquiao aron preparado ug sakto na kini sa kondisyon sa higayon nga mag-abot sila si Marquez sa bulan sa Septiyembre. Mao usab kini ang gusto ni boxing trainer Freddie Roach.

Kon sa Septiyembre pa moaway si Manny mora og hataas ra kaayo ang iyang bakasyon. Lisod og manambok si Pacquiao tungod sa kahataas sa iyang pahuway. So, aron physically fit siya, ideal sab kaayo alang kaniya nga mag-aktibo aron di matay-an.

Basin og nahadlok lang ni si Arum nga tingali og mapildi na sab si Manny unya maapektohan ang Pacquiao-Marquez 5 nga gipanag-an nga mao karon ang giatngan sa mga boxing aficionados.

Laing posibling rason, mao nga gusto sab ni Pacquiao nga moaway sa Abril aron duna kini magasto alang sa umaabot nga piniliay.

Niapil ug magpapili ra ba ning iyang mga igsuon sa umaabot nga piniliay didto sa General Santos City, ug natural nagkinahanglan kini og saktong budget.

Sa gikaingon ko na, nga anaa gyud sa Talk ‘N Text Tropang Texters ang bintaha sa finals showdown sa Philippine Cup tali sa Rain or Shine Elasto Painters.

Wa gyud ta masipyat og ila gyud gigamit ang ilang bintaha sa experience, gidak-on ug ingon man teamwork. Tan-awa wa gyud katuyo ang Elasto Painters kay gitapos man sa Tropang Texters ang series, 4-0.

Gamefowls: Sa atong mga sunod nga lindog, ato diayng gahinan og luna ang kalabot sa mga derby o gamefowls. Dinhi ning dapita atong hisgutan ang kabahin sa cockfighting industry lakip na niini ang mga breeding seminars o mga derby. Daghan man sab gud tang tigbasa nga mga mahiligon og manok. Makapadala usab kamo og mga sugyot. Daghang salamat.