Pacquiao miinsister; gustong moaway sa Abril

15

MIINSISTER gyud si boxing superstar Manny Pacquiao nga gusto gyud siyang moaway karong Abril bisan pa man og wa pay dapit nga kapahigayonan.

Gipadala na ni Pacquiao ang iyang adviser nga si Michael Koncz ngadto sa Singapore aron pagtanaw og dapit nga iyang kaawayan.

Sa interview sa ABS-CBN News si Pacquiao mibutyag nga kon way lugar sa Singapore, posibling ang away anha ipahigayon sa Rizal Memorial Stadium sa Manila.

“Nakasanayan na April [lumalaban tayo],” matod sa Filipino boxing star. “Sisikapin natin na [dito gawin] sa Pilipinas. Kung dito sa Pilipinas, baka sa Rizal Memorial Stadium.”

Sa sayo pa, ang iyang promoter nga si Bob Arum mipabuhagay nga di siya pabor nga moaway si Pacquiao sa Abril tungod sa problema sa lugar.

“Manny was going to fight in April, but now, it doesn’t look like he is going to fight in April. He won’t fight until September,” padayag sa boxing promoter.

Ingon ni Arum nga mahimong makaaway si Pacquaio sa Abril sa Macau.

“Macau has one arena that’s suitable, and that’s in the Venetian… [Top Rank president] Todd duBoef went over to Macau to arrange for a Pacquiao fight in April, and, unfortunately, a Korean pop star had signed a contract for the building for most of April,” ingon ni Arum.

Gisaysay ni Arum nga di na interesado si Pacquiao nga moaway sa US tungod sa kadako sa bulohisan.

“Pacquiao doesn’t want to fight in the United States because he’d have to give close to 40 percent [in taxes] to the government.”

Sa dugang kalambuan, gikompirmar karon ni Pacquiao nga nisampit na sila karon sa grupo ni Manuel V. Pangilinan aron sa posibling pagpahigayon sa away karong Abril.

Si Ricky Vargas, ang sinaligan ni Pangilinan mikompirmar usab nga nagkahinabi na sila ni Eric Pineda, ang business manager ni Pacquiao.

Si Pacquiao, sa pagkakaron, nagdumili pa paghatag og pamahayag kon duna na bay negusasyon alang sa Pacquiao-Marquez V.