World-class operation sa Ceres bus
KALUWASAN, komportable ug makalingaw nga biyahe – ang nag-unang tumong sa paglusad sa automation program alang sa tanang aircon buses sa Ceres Transport, Inc., usa sa upat ka bus companies ubos sa Vallacar Transit, Inc.
Marso ning tuiga, ang Ceres aircon buses duna nay koneksyon sa internet pinaagi sa Wifi nga gipalambo nga teknolohiya sa Smart Communications nga haom sa sistema sa bus. Sa sunod tuig, ang automation sa koleksyon sa pletihan ipatuman.
Si Dr. Herman B. Omecillo, vice president for administration and MIS, niingon nga ang automation sa koleksyon maoy solusyon batok sa tulis ug tentasyon nga makadispalko nga sagad mataktakan sa mga konduktor.
Pipila ka sakop sa media sa Sugbo ningbisita sa halapad nga head office sa Yanson Group of Bus Companies (YGBC) sa dul-an sa 20 ka ektaryang luna sa sa Barangay Mansilingan sa dakbayan sa Bacolod.
Makita sa dapit ang modernong Administration Building ug mga state-of-the-art industrial nga nagserbisyo sa ilang operasyon sa nagkalainlaing sanga sa kom- paniya libot sa tibuok nasod, labi na sa Visayas ug Mindanao.
Sa pagkakaron, ang Vallacar Transit, Inc. dunay 2,300 ka buses, aircon ug regular, nga naa sa ilang sanga sa Batangas, Bacolod, Dumaguete, Iloilo, Cebu, Bulua ug Yacapin sa Cagayan de Oro City, Butuan, Davao, Pagadian ug Dipolog.
Ang YGBC dunay upat ka companies nga dunay rota sa managlahing dapit sa nasod mao ang Vallacar Transit, Bachelor Express, Rural Transit (Mindanao) ug Ceres Transport, Inc.
KASAYSAYAN
Ang Vallacar Transit, Inc., labing dako nga land transport company sa Pilipinas, natukod niadtong 1968 sa magtiayong Ricardo B. Yanson ug Olivia Villaflores gikan sa usa lang ka 14- seater jeepney.
Niadtong 1970s, ang magtiayon nakahukom sa pagpalambo ngadto sa mini bus line nga nagbiyahian sa Bacolod CityValladolid- La Carlota (busa Vallacar) ug ningalan niini nga Ceres Liner.
Niadtong 1980, Ceres Liner nibiyahe sa tibuok isla sa Negros ug niadtong 1981, nisugod sa operasyon sa Mindanao.
Napalit sa kompaniya ang linya sa mga nag-unang bus liner sa Kabisayan ug Mindanao busa nahimong dominante nga bus company sa Vismin regions diin nagbiyahe ang 80 porsiyento sa iyang mga sakyanan ug ang uban didto sa Luzon.
Gikan sa yanong sinugdanan, ang YGBC andam na nga mahimong world-class bus company nga molugway sa iyang operasyon sa ubang bahin sa Asya.