’UKAY-UKAY’ HINABANG SA YOLANDA?
Tag-iya sa sama og 2 ka andanang mga sapot nanghimakak
MGA ukay-ukay nga susama ka taas sa duha ka andanang edipisyo nga makita sa lungsod sa Cordova gidudahang mga hinabang unta sa mga biktima sa bagyong Yolanda.
Ang mga sapot gipamaligya na lang sa barato nga presyo nga kubos kon itandi sa naandan nga mga ukay-ukay.
Apan ang tag-iya sa mao nga mga sapot nihimakak sa pasangil ug nipasabot diin kini gikan.
Tungod sa di naandang gidaghanon sa nagkadaiyang matang sa mga sapot, daghan ang nakapangutana kon nganong naabot kini sa maong lugar ug alang kini kini kang kinsa.
Dinhi nitumaw ang mga tabi-tabi sa mga lumolupyo sa dakbayan sa Lapu-Lapu ug Cordova nga ang maong mga sapot nga gikan sa gawas sa nasud mga hinabang nga wa mahatag ngadto sa mga biktima ug gipamaligya na.
Nasayran sa Sun.Star Superbalita nga ang tag-iya niini mao ang Virlo Construction Development Corp. nga gipanag-iya ni Virgilio Pongase.
Si Pongase nipasabot nga bakak ang ningkatap nga mga estorya sa social media nga mga hinabang kini.
Siya nibutyag nga siya ang nakapalit sa duha ka bodega nga relief items sa Mactan Export Processing Zone (MEPZ) nga gipanag-iya sa ukay-ukay king kaniadto nga si Richard King.
Aduna untay mopalit niini nga taga isla sa Negros apan wa gihurot sa pagkuha hinungdan nga napugos sila sa pagbalhin niini ngadto sa ilang yarda.
Ila kining gibalhin kay ila nang gi- develop ang bodega ug aduna na usay mogamit niini.
Matod niya nga way kamatuoran ang report nga alang kini sa mga biktima sa bagyong Yolanda.
Ang iyang kompaniya nakahatag na og dul-an sa 1,000 ka mga bandol sa ukay-ukay agig tabang sa mga biktima sa linog sa Bohol ug bagyong Yolanda, ilabi na sa Tacloban.
Siya niingon adunay namalit og binagsa hinungdan nga mabungkag sa sako ug ila na lang nga gitapok sa usa ka lugar.
Ila kining gibaligya sa ubos nga presyo aron usab makabawi sila sa ilang nagasto nga gasolina sa ilang sakyanan paghakot niini.
Iyang gibutyag nga sa Sabado ug Dominggo bukas kini sa tanang tawo nga mopalit og binagsa sa presyo gikan sa P5 ngadto na sa P25 matag buok.