1,000 na ka balay padayon gitukod alang sa mga naigo ni Yolanda

KAPIN na sa 1,000 ka mga balay ang padayong napatukod sa kagamhanan sa lalawigan sa Sugbo sa tabang sa mga langyaw ug lokal nga mga donor alang sa apektadong mga pamilya sa amihanang Sugbo human gigusbat sa bagyong Yolanda halos tulo ka buwan na ang nakalabay.

Apan sa record gikan ni Marten Van Der Veen, shelter cluster information manager ug miyembro sa International Red Cross sa Netherlands, nagpakita nga miabot og 103,000 ang mga apektadong household sa Sugbo tungod sa bagyo.

Sa record sa Task Force Paglig-on, ang nangu sa nagpadayon nga rehabilitasyon sa gigusbat nga mga lugar sa amihanang Sugbo, 200 ka mga balay ang padayong gitukod sa lungsod sa Sta. Fe, 520 sa Bogo City ug 360 sa lungsod sa Daanbantayan.

Si Baltazar Tribunalo, pangu sa Task Force Paglig-on, nipahibawo nga niabot pa lang og P22 milyones ang ilang nadawat nga donasyon gikan sa mga pribadong korporasyon, non-government organization, mga lokal nga kagamhanan ug ubang donors nga gigamit alang sa emergency response ug rehabilitation.

Ang provincial government niduso sa nasudnong kagamhanan og P26.8 bilyones alang sa rehabilitation ug recovery program sa mga dapit sa northern Cebu.

Apan hangtod karon wala pa mopahibawo ang Malacañang kon pila ang mahatag nga pundo sa Sugbo gikan sa P14.6 bilyones nga giaprobahan sa Kongreso alang sa rehabilitasyon sa mga lugar nga gikusokuso sa bagyong Yolanda.

Si Mae Ybañez, executive director sa Cebu Chamber of Commerce and Industry ug usa sa mga miyembro sa livelihood ug commerce cluster sa task force, namahayag nga gipaningkamotan nila nga mahan-ay ug mausa ang kooperasyon tali sa nasodnong kagamhanan, mga LGU, donor ug ang apektadong mga komunidad.

Siya nasubo tungod kay dili magamit ang tanang resources sa nasodnong kagamhanan.

“What is frustrating kay we cannot tap all the resources of the national government for us. It’s not yet coming in...It cannot be made available. It’s been like that all the time,” padayag ni Ybañez.

Matod ni Tribunalo si rehabilitation czar ug kanhi Senador Panfilo Lacson mipadala na og post-disaster need assessment team nga maoy mo- validate sa assessment nga gisumitir sa nagkadaiyang mga local government unit nga naapektuhan sa super typhoon.

Si Provincial Information Officer Ethel Natera nagkanayon nga 2-3 ka semana nga gisuroy sa maong team ang nagkadaiyang LGU tungod kay gusto nila i- validate ang data nga nadawat niini sa dili pa makahatag sa gipangayo sa probinsya.

“They don’t want to rely lang gyud sa data nga gihatag sa LGUs kay naa sila’y kaugalingong criteria,” dugang pa niini sa pakighinabi sa mga tigbalita.