Road widening project sa Tayud gibalik sa Kaulohan

IBALIK na sa lalawigan sa Sugbo ngadto sa nasudnong kagamhanan ang pagpatuman sa road widening project sa Tayud, Consolacion ug Tayud, Liloan, sumala ni Bise Gobernador Agnes Magpale.

Matod ni Magpale nga si Gobernador Hilario Davide III nisanong na sa pag- terminate sa memorandum of agreement tali sa probinsya ug Department of Public Works and Highways (DPWH)7 ug ihatag sa maong ahensiya ang paghimo sa proyekto.

“We will rather give it to the national government kay they’re better in building kay national project baya ni. Ambot nganong gipangayo pa man,” nagkanayon si Magpale dihang nahinabi sa mga tigbalita kagahapon.

Ang DPWH 7 nakahukom nga i- terminate ang MOA tali sa provincial government human ang uwahi napakyas pagpatuman sa proyekto.

Si Provincial Engineer Hector Jamora nipasabot ang kalangay pag-isyu sa road-right-of-way maoy hinungdan nadugay ang proyekto.

Si Magpale namahayag nga naglisod sila pagpatuman sa paglapad sa karsada sa nahisgotang mga dapit tungod kay ang mga tag-iya sa yuta nga maapektuhan sa proyekto wa mosugot nga ibaligya kay gusto nila nga bayran sila og una sa Kapitolyo.

“Because the owners of the affected properties wa na mosugot og dili makakita og kwarta, way pagsalig sa probinsya... Unya dili man na how COA works before,” dugang niya.

Siya nidugang wa na usab sila ka- liquidate sa P50 milyones nga gidownload sa DPWH 7 sa Kapitolyo pipila ka tuig na ang nakalabay human nangatangtang sa trabaho sila si kanhi Provincial Treasurer Roy Salubre ug kanhi Provincial Engineer Eulogio Pelayre.

Ang negosasyon sa road-widening project gisug panahon sa administrasyon ni kanhi Gobernador ug karon Kong. Gwen Garcia.

“Na- suspended na lang siya, wa gihapon mapatuman,” dugang ni Magpale.

Ang maong proyekto mahinungdanon tungod kay samtang ang Cansaga Bridge ug Cebu North Road adunay tagupat ka lanes, ang Tayud Road aduna lay duha ka lane.

Kon mahuman na ang proyekto, maminosan na unya ang kahuot sa trapiko sa siyudad sa Mandaue ug magsilbi pa kini nga shortcut paingon sa Mactan-Cebu International Airport ug amihanang Sugbo.