Mga vendors gipangsuspenso

GISUSPENSO sa Cebu City Government, pinaagi sa Garbo Asenso Sumbanan Alyansa (Gasa), ang pagpaninda sa 11 ka mga vendor sa dalan B. Rodriguez ug 30 ka stalls nga namaligya og imahen ni Sr. Sto. Niño sa dalan D. Jakosalem.

Si City Administrator Lucelle Mercado kinsa maoy pangulo sa Gasa niasoy sa mga tigbalita nga gipakyas mismo sa mga vendor ang ilang pasalig ngadto sa iyang buhatan.

“Ingon sila sila ray mopolice, sila ray mobadlong, ilang kuhaon ang extension para malimpyo ug malibre ang agianan so the pedestrian can pass unya karon wala man motuman.Wa nila tumana ang ilang gisaad,” matod ni Mercado.

Gipadayag sa chairman sa Gasa kinsa maoy nagkontrolar sa mga sidewalk vendor sa siyudad nga ila nang gihatagan og higayon ang mga tindera hilabi na niadtong panahon sa Sinulog apan paghuman sa kapistahan ni Sr. Sto. Niño wa gihapon mahapsay ang B. Rodriguez buyon sa Vicente Sotto Hospital.

Nipahigayon og surveillance ang Gasa sa niaging semana ug giusban sa niaging adlaw ug wa gihapoy nakitang kausaban si Mercado diin ang mga tawo maglisod na og lagbas sa sidewalk ug ang uban adto na mamidpid sa karsada nga naghatag og hulga sa ilang kinabuhi gumikan sa mga sakyanan.

Sama usab ang nahitabo sa mga vendor kilid sa Basilica Minore del Sto. Niño diin ang City Hall nibutang og yellow railing mga tulo ka metros gikan sa stall aron maoy agian sa mga tawo apan ang maong espasyo giplastaran na sa mga vendor ug dili na makaagi ang pedestrian, paghulagway ni Mercado.

Ang City Hall nihatag kanila og higayon nga makausab sa ilang kalapasan apan wa gihapon mausab ang ilang sistema.

Makabalik og tinda ang mga vendor sa Sto. Niño karong Biyernes samtang ang B. Rodriguez ugma nang adlawa, pahibawo ni Mercado.

Ang pagsuspenso sa ilang pagtinda mao ang pagpahinumdum kanila nga dili angay ibaliwala ang patakaran sa GASA dugang sa administrador.

Samtang boluntaryo nga nipahawa ang mga vendor sa dalan V. Gullas kagahapon uban sa presensiya sa Probe Team sa City Hall aron mahawan ang dapit.