Kapulisan gihagit nga unahon og sikop ang mga bigtime pusher

ORMOC CITY- Gihagit sa publiko ang kapulisan ning dakbayan nga sikupon og una ang mga big time nga tigpayuhot og drogas ug di ang mga ginagmay lang.

Sa programang Serbisyo Publiko evening edition sa dyAJ Power 90.3 FM, daghan ang nipadangat sa ilang mga sentimento nga mas maayo nga puohon sa kapulisan ning dakbayan ang kadtong dinagko ang pagbaligya kay og ang mga small time lang ang sikupon dako og posibilidad nga makasuplay pa gihapon og drogas ang kadtong mga big time.

Sa iyang bahin, ang bag-o nilingkod nga city director sa Ormoc City Police Office (OCPO) nga si Jose Macanas miingon nga ning iyang paglingkod problema sa drugas ang una niyang hatagan og pagtagad. Gani, buot usab niya nga pakusgan ang pwersa sa barangay tanod nga maoy makatabang nila sa pagpahibawo kon dunay ilegal nga kaliokan sa usa ka barangay.

Suportado sa hepe sa police station 1 nga si P/ CInsp. Ibrahim Jambiran ang pamahayag ni Macanas.

Matod ni Jambiran nga daghan sila og gipanid-an karon nga mga tigpayuhot og gidiling drugas ug iyang gisaad nga wa silay pasipyaton big time man o small time ang importante nga makigtambayayong lang usab sa ilaha ang katawhan aron masikop ang mga tigpayuhot.

Uwahing nasikop sa kapulisan sa station 1 sa gipahigayong buy bust operation niadtong milabayng gabii mao ang usa ka 23 anyos nga si Vincent Ligitan, dunay kapuyo, nagpuo sa dan Osmeña, District 17 ning dakbayan diin duol kini sa dan Mabini nga notado na sa baligya og ilegal nga drugas.

Matod ni Jambiran nga bag-ohay pa nisud sa kalihokan si Ligitan kinsa taudtaod na usab nga gipanid-an sa kapulisan.

“Itong nahuli natin isa rin ito sa mga suspek sa nangyaring snatching kung saan gumagamit ng motorisiklo ang suspek at marami na tayong natanggap na sumbong galing sa mga concerned citizen,” butyag ni Jambiran.

Nakuha gikan kang Ligitan ang tulo ka pakete sa gituhoang shabu, mga salapi lakip na ang duha ka P500 nga marked money.

Mialigar ang suspek nga planted lang ang mga ilegal nga butang nga nakuha gikan kaniya.

Gipasakaan nag kasong kalapasan nga napatik sa Republic Act (RA) 9165 ang suspek.