Papel nga giduwa

GINAINGON nga ang kinabuhi maoy usa ka bantawan. Kita mao ang magduduwa nga adunay tagsatagsa ka mga papel nga gihuptan. Ang gamhanang director mao ang Diyos nga gituohan natong kapalaran.

Si Vhong Navarro usa ka bantugang artista ug TV host. Tungod niini gukdunon siyag mga babaye. Kay usa ka playboy daghang nangabiktima gikan sa mga birhen ngadto na sa mga tuwakhang nga nagpaapupa kaniya. Kini ang iyang tulukibong papel sa kinabuhi. Dinhi nahinumdom ko sa akong higala niadto nga butakal kaayo sa mga babaye. Wala ug tuo ang nagbakho nga mga dalagingding. Unsaon, siya guwapo ug de awto.

Kausa, gikiha siyag pagpanglugos. Ako nagtuo nga wa niya kadto mahimo nga butangbutang lamang agig panimawos sa babaye. Maayo gani nahilot sa iyang abogado.

Si Deniece Cornejo usa ka modelo. Guwapa. Ambisyusa. Usa ka starlet. Suma sa balita si Vhong iyang gioral sex makausa sa ilang panagtagbo. Iya na sad ning papel.

Kadaghan sa mga babaye nga ingon kaniya. Isugal ang tanan matuman lang ang pangandoy. Gipuhonan ang katahom. Yakan lang ang moralidad. Nalimot na gyud sa katarong.

Si Cedric Lee lain nga gama nga tawo. Kadiyot masuko kay mangulata. Laig kinaiya, matod pa ni Senador J.V. Estrada nga nakahimamat kaniya kay nakakuhag proyekto sa San Juan sa mayor pa siya. Iya sad ning papel.

Unya, kay kontraktor nga milyunaryo ug daghag koneksiyon nga mga dagkong tawo sa kagamhanan misamot ang iyang kamaldito kon masuko. Sama ni Vhong, usa sad ka lover boy.

Mga artista ug mga model ang tirada. Kadaghan kaha ang nangabiktima kay ang gipalihok kuwarta. Naghilom lang, tingali. Ang nabaniog mao ang artistang taga Bogo (di moangkon usahay nga taga Cebu siya) nga si Vina Morales. Gipaangkan sa karah

Si Vhong nasakpan ni Cedric Lee. Kauban sa mga barkada, si Vhong iyang gikulatag gibunog didto sa Condo ni Deneice. Inabangan ni Cedric. Tagam! Singgit sa nasuya nang daan sa aktor.

Kangilad anang tawhana maayong bilangguon! Tuaw sa mga fan ug sa mingsimpatiya sa actor. Sa survey sa ABSCBN, 98% sa 6,000 ka mga tawo laban kang Vhong. Ang 2% kang Cedric ug Deniece tawon.

Gilampinig sa daghang kaso si Cedric nga gibira kaniya ni Vhong. Sama sa serious physical injuries, grave threat, frustrated murder ug illegal detention. Mibawos ang kampo ni Cedric ug Deniece sa mga kasong libel ug rape.

Samtang husayon pa kini, sila si Vhong, Cedric ug Deneice are presumed innocent yet before conviction. Ang di maayo mao nga sila si Cedric ug Deneice gihukmang sadan na sa katawhan.