Mayor Rama ‘gidaugdaog’
KINI maoy yano nakong pagsabot. Di lang tingali pagdaugdaog, apil na ang pagpakauwaw ang katuyoan sa mga konsehal sa konseho nga sakop sa Bando Osmena Pondok Kauswagan (BOPK), ngadto kang Mayor Mike Rama?
Di pa lang dugay gipakalitan og drug test ang mayor. Kay kalit man, naigking intawon ang mayor ug nibalibad. Apan pagkasunod adlaw, nipaubos na sa drug testing ang mayor isip pagsunod sa ordinansa sa siyudad.
Daghan ang nasayod nga way bisyu sa paggamit og illegal nga drugas ang mayor. Gani sa unang adlaw sa pagdumili gitagaan man dayon og kolor sa iyang mga kaatbang sa pulitika sa tuyo nga mabulingan ang pangan ni Rama.
Tungod kay hugaw man lagi og duwa ang BOKP angayang bantayan sa mayor ang dagan sa resulta. Delikado man gud nga himuong positibo ang negatibo unyang resulta sa drug test. Maayo raba kining moduwa ug ginagoy ang kontra sa mayor.
Mahinumdoman, dunay mga pulis sa Sugbo nahimong positibo sa drug testing. Apan sa dihang gipada sa Camp Crame ang resulta nahimo mang negatibo. Diha say shabu nga nasimhutan sa sniffing dog nga gipalusot sa airport, nahimo nang tawas pagpada didto kampo Crame aron eksaminon.
Naluya ug nasakit gud intawon to ang iro. Di tungod sa negatibong resulta kun di gumikan sa nagkaluya ang resistansya sa lawas. Apan dili ang taga BOPK ang hinungdan sa kausaban sa resulta ha. Ayaw kalimti sa katuyoan sa pulitika motumaw man gud ang daghang binoang.
Samtang, kana lang ganing paglaslas sa budget nga gipangayo ni Rama sa konseho alang sa tuig 2014, sa kantidad nga dul-an sa P10 bilyones ug ang giaprobahan ang kapin lang sa P5 bilyones dili bana binoang ug pagpanaugdaog
Sa P10 bilyones, naa nay plano si Rama, para sa mga proyekto. Tan-awa kay P5 bilyones lang ang budget naapektahan ang financial assistance alang sa mga senior citizes. Mao nga puwerting budget sa mayor aron mabahinbahin ang salapi alang gitaganang mga proyekto, mao nga naibanan ang budget sa paghatag alang sa mga senior karong tuiga 2014.
Kon minos ug dili dagko ang mga proyekto ni Rama karong tuiga, ang angayang tingaling basulon sa katawhan ang mga batabatang konsehal ni kanhi mayor Tomas Osmeña. Laktod pagkasulti ang mga kabus maoy masakripisyo ug makaluluoy ug di ang mayor.
Daghan ang nagtuo nga nahadlok si Tomas nga mabuhong ang katawhan sa ilang mga panginahanglan ubos sa kasamtangang liderato ni Rama, kon ihatag ang maong budget. Kay sa pagdagan unya ug balik pagka mayor sa siyudad sa 2016 nga piniliay ilubong si Tomas ug taga liog ni Mike.
Kon imong paminawon ang pamahayag sa abogado sa kampo ni Deniece Cornejo ug Cedric Lee, mga suspek sa pagkulata ni Vhong Navarro, dunay pagpabor ang National Bureau of Investigation ( NBI) sa imbestigasyon sa kaso.
Mahimong sakto ang ilang pagduda. Hinuon, sila man ang nahimong suspek sa kaso. Kon wa pa nila kulataha si Navarro ug ilang gireklamo og kasong pagpanglugos, mohimo sab tingali og imbestigasyon ang NBI. Apan atong nabantayan nga dunay nagpresyur sa NBI sa kapaspas sa imbestigasyon sa reklamo ni Navarro.