Syringe nagtaop pa sa bukton ni Philip

LAIN na usab nga celebrity ang namatay gumikan sa gituohan nga drug overdose ang award winner actor nga si Philip Seymour Hoffman, 46.

Napalgan si Hoffman sulod sa iyang New York City apartment nga wala na magginhawa diha sa iyang bathroom nga nagbuy-od ug igo lang nagsul-ob og boxer shorts.

Nasuta sa rescue personnel nga nagtaop pa ang injection diha sa bukton sa actor ug nagpasad ang 10 ka glassine envelopes ug duha niini mao ray adunay sulod nga heroin laing matang sa drugas.

Ang glassine envelope gagmay nga envelope nga ginama sa nipis ug sinawon nga matang sa papel nga gihulagway nga air ug water resistant.

Sa imbestigasyon sa New York police nasayran nga wala kuhaa ni Hoffman ang iyang mga anak niadtong Domingo sa alas 9:00 sa buntag nga dili maoy naandan sa actor, hinungdan nga gisusi sa iyang higala ang iyang gipuy-an ug nasuta ang iyang gidangatan.

Sa sayo pa, gisulod sa rehabilitation facility si Hoffman gumikan sa iyang pagkagumon sa ginadiling drugas niadtong buwan sa Mayo.

Kasamtangan nga wala pay opisyal nga autopsy report sa tinuoray nga hinungdan sa kamatayon sa actor.

Ania ang pipila sa mga pelikula ni Hoffman sa dihang buhi pa nga naglangkob sa “Scent of A Woman”, 1992; “Boogie Nights”, 1997; “The Big Lebowski”, 1998; “Magnolia”, 1999; “Talented Mr. Ripley”, 1999 ug “Almost Famous”, 2000.