Nahigugmag lain

Dear Papa Joe,

Ako si Sano. Ang akong problema bahin sa akong lovelife karon. Naglibog ko kon kinsa ang akong pilion sa duha ka mga babae ang akong uyab or akong friend.

Ang usa kay mag 4 years na mi, while ang usa kay we know each other nga ganahan mi sa usag-usag ug mas maayo pa siya kay sa akong uyab karon. Hinuon ang akong uyab nga hapit na mi mag 4 years kay dugay na nakong kaila didto pa sa among isla sa Bohol. Complicated man gud ang among situation ron kay tungod lagi anang NPA ko or no permanent address. Maong panagsa ra me magkita sa akong uyab. Kay nag-eskwela man gud ko unya nag- boarding ko dapit sa among eskwelahan. College level na hinuon ko ug one year na lang ang kuwang para makahuman ko sa akong pageskwela.

Tungod kay panagsa ra ang contact sa akong uyab, na- develop akong feeling sa usa nako ka friend nga babaye. Okay siya ikauban kay suod man gud ko niya ug sa iyang parents. Naa siya permi sa akong kiliran kon naa man koy problema kay naa ra mi sa usa ka kompaniya nagtrabaho. Ako kay nag-OJT ug siya sab.

Until one time we express each other nga naa miy gusto sa usag usa ug mao niy nakapalibog nako kay unsaon na lang kadtong akong uyab. Ang nakabati lang ani kay ang akong uyab wa kahibaw pero at least nakahibaw na ang akong friend nga naa koy uyab pero kon timbangon mas gusto nako ang akong friend. Naglibog na ko unsay angay nakong buhaton. Palihog tambagi ko kon unsa ang angay nakong buhaton.

SANO Sano,

Kon ako ang imong pasultihon, adto ka kon asa ka malipayon ug komportable. Pero nasayod ko nga dili sayon pero mas maayo nga mopranka ka sa imong uyab kay sa papuy-on nimo siya nga nagdahom nga naa kay gugma. Kon pilion nimo imong uyab kay nalu-oy ka, sa pagkakaron lang na kay basin puhon makasugat na sab ka og lain, mao lang gihapon imong bation, maglibog na sad ka.

Siguro dali ra para niya magbuwag mo kay naanad na siya nga lagyo mo ug kadto siya hayan naa na sad na sa iyang huna-huna nga basin mangita kag lain kay lagyo mo bisan para niya honest ka. Kon gusto kang honest niya, mosulti ka sa tinu-od nga gibati nimo. Kana lang ug daghang salamat.

PAPA JOE