Fajardo naluya
GIBUHAT sa higanteng si Junemar Fajardo ang tanan niyang makaya apan nausik ra ang tanan dihang nahisugamak sa 83-88 nga kapildihan ang Petron Blaze Boosters batok sa Rain or Shine Elasto Painters niadtong Lunes sa Game 4 sa Philippine Basketball Association (PBA) Philippine Cup semi-finals series.
Ang kapakyasan nakaduot sa Blaze Boosters ngadto sa 1-3 nga biya sa best-of-seven series.
Produkto sa University of Cebu (UC) Webmasters, si Fajardo miduwa sulod sa 44 ka mga minutos, upat ra’y kuwang sa kinatibukang duwa, ug nagbangis kini sa pagpupo og 27 puntos, 17 rebounds, ug duha ka blockshots.
Sa nahabiling kapin sa lima ka mga minutos, natabla sa lumad nga taga Pinamungajan, Cebu ang duwa sa 82.
Apan human niadto, puwerte nang pagkabahar sa tanang mga sakop sa Blaze Boosters ug igo na lang silang nakadugang og usa ka puntos.
Giangkon ni Fajardo nga naluya na sab gyud siya.
“Napagod rin ako, daming bumabangga sa akin,” asoy ni Fajardo sa interbyu sa InterAksyon. “Machine nga nag-o- over heat, tao pa kaya.”
Ang Elasto Painters nagkinahanglan na lang og usa ka daog aron makaabante sa finals apan giklaro ni Fajardo nga dili sila bastabasta moisa sa ilang bandera.
“Medyo pressure sa side namin kasi sila isang panalo na lang, pero positive naman kami,” pagtino sa 6’10” nga higante. “Hindi namin basta iibigay yan.”