Sanmig 3-1 tuyo batok Ginebra
Duwa karon 8:00 pm- San Mig batok Ginebra
MOSUWAY pagkulit og dominanteng 3-1 nga bintaha ang San Mig Coffee Mixers sa ilang pagpakigbatok og balik sa Brgy. Ginebra Gin Kings karong gabii sa Game 4 sa ilang semi-finals series sa Philippine Basketball Association (PBA) Philippine Cup sa Araneta Coliseum.
Ang Coffee Mixers mikulit og 2-1 nga bintaha pinaagi sa 97-89 nga kadaugan sa Game 3 niadtong Dominggo apan bisan pa niini, nagkanayon si Coffee Mixers coach Tim Cone nga dili siya komportable niini.
“It’s gonna be a tough seies, we are still not comfortable having lead 2-1. We need to be A+ (plus) to beat Ginebra,” asoy ni Cone, kinsa nagtinguha sa iyang ika-16 nga titulo isip coach ug ika11 alang sa Coffee Mixers (kanhi Purefoods).
Si Cone, kinsa nakatunol na og duha ka mga titulo sa Coffee Mixers sukad sa iyang pagbiya sa Alakas Aces niadtong 2011, nagtuo nga determinadong mobawi ang Gin Kings ning higayuna gamit ang “never-say-die” nga kinaiya niini.
Hapit sa tanang mga departamento balanse ang Coffee Mixers ug Gin Kings sa Game 3 gawas lang seguro sa three-point area diin nakabintaha ang Coffee Mixers pinaagi sa ilang 53 percent 8-of-15 gikan nila ni June Peter Simon, Joe Devance, Justin Melton, ug Mark Barroca.
Ang Kings igo lang mitali og 4-of-13 shooting sa threepoint area o 30.8 percent.
Ang 7- footer nga si Greg Slaughter gilaumang maoy makapabangon sa Gin Kings ning higayuna. Nimugna siya og 29 puntos ug 13 rebounds sa Game 3.