Tungod sa butakal

“NGANONG binali man ang kalibutan sa mga hayop? Ang lake mao may bayran kon motakal sa baye?” sukot ni Wilben kang Marjorie samtang silang duha nag-apong sa butakal ni Marjorie nga naghabal sa anay ni Wilben.

Nia sila ning sayong kabuntagon sa tugkaran sa balay nilang Marjorie sa baryo Embera. Sa naandan sa gagmay pa sila sukad pa sa nagtungha pa sila sa elementarya hangtod karong nakatapos na sila sa hayiskol, si Marjorie maoy sinugo sa iyang ginikanan nga mobantay sa ilang butakal. Si Wilben ang tigguyod sa ilang anay ngadto sa ilang Marjorie kon magpatakal.

“Bastos! Bastos! Ambot nimo anang imong pangutana!” masuk-anong namulong si Marjorie nga mitalikod kay di gustong makakita sa ilang butakal nga daw nagbarina sa lubot sa anay.

“Kon bastos pa nang buhata, bastos diay ang Ginuo kay iya mang sugo nga magsanay ang tawo ug hayupan?” ni Wilben.

Wa na motingog si Marjorie nga padayong nagtalikod kang Wilben. Kontra ni Marjorie si Wilben. Sa gagmay pa sila kanunay silang magaway. Dili si Wilben ang mangaway; si Marjorie. Kon moduol si Wilben sa pundok nilang mga babaye singkahan dayon siya ni Marjorie. Tulisukon ug papahawaon. Ang tuyo ni Wilben kay makigsuod sa usa sa mga higalang babaye ni Marjorie. Apan di siya makadugay sa ilang pundok. “Hawa diha, Budlat! Dakog ulo! Payatot!” kanunay isaway ni Marjorie kang Wilben. Mangawot na lang sa iyang ulo si Wilben nga mopahilayo, naghambin og hilom nga kahiubos.

Magkaduol lang silag pugos kon suguon sa masigka ginikanan sa pagpahabal sa mga baboy. Ang tipik sa negusyo sa ginikanan ni Marjorie mao ang butakal nga maayo ug dumalagko og kaliwat. Bayran sa tag-iyag mga anay (sama sa ginikanan ni Wilben) kon magpaliwat sa butakal. Dihang nag-prinsesa si Marjorie sa pista sa ilang baryo, napugos pag-konsorte si Wilben, kay nasakit ang sinaarang konsorte nga ig-agaw ni Marjorie. Managhigala man ilang mga ginikanan tungod sa negusyo sa baboy. Bisag didto na sila sa bantawan naghinunghongay silag lalis.

Ingon niini ang ilang relasyon hangtod nakahuman silag hayiskol. Wala silay ganang motungha sa kolehiyo kay nalingaw silag pamuhi og butakal ug anay. Si Wilben nalingaw sa anay. Duna na siyay tulo ka mga anayon. Si Marjorie duna na say tulo ka mga butakal. Premyohan sila sa ilang ginikanan kon maayog agi. Unya miabot ang panahon nga nakigkompetensiya na hinuon sila sa ilang mga ginikanan sa maong negusyo.

SAMTANG nagtalikod si Marjorie naaninaw ni Wilben ang kausaban sa pigura sa dalaga. Bigot na ug may mga kurba na. Nausab ang iyang katahom. Kaniadto ang nakita ni Wilben mao ang kamaldita ug ka-tombuyon lang ni Marjorie. Karon, nakapahiyom si Wilben nga nagtan-aw sa dalaga. Ug misidlak ang iyang mga mata sa naamguhan. “May tinaguan diay siyang katahom!” tuaw ni Wilben sa hilom. Siya kaniadto tinuod nga daot o niwang. Morag budlat ang iyang mga mata ug dakog ulo tan-awon. Apan karon, di na lang siya modayeg sa iyang kaugalingon kay mora na man siya ka-macho kang Derek Ramsay. Sa iyang paugnat sa kusog kay siyay tigkawos og tubig sa ila, tigpangahoy, tigbughag kahoy, tigpangalsag bug-at sa ilang balay, na-macho ang porma sa iyang lawas.

“Nganong kontra man gyud kaayo ko nimo kaniadto, Marj?” “Di kay kaniadto lang. Hangtod karon.” “Uy! Pangigi ra diay nang imo, no? Nga di ikaw ang akong giduol, no?”

“Malaa ka diha! Ambot nimo? Hambugero!” ni Marjorie nga nagtibi ug kahilakon.

Nasiklapan ni Wilben ang butakal nga nagkabayo gihapon sa anay. Nanginit iyang lawas. Kalit niyang gigakos si Marjorie ug gikupogan paghalok. Miliso si Marjorie ug mibawos.

PAGLABAY sa usa ka tuig kapin, nakapalit na si Wilben og tora-tora (traysikol) nga serbis sa ilang anay ug butakal. Mabdos na si Marjorie nga nag-angkas sa tora-tora nga gimaneho ni Wilben. Nahiusa na ang ilang negusyo sa butakal ug anay. Karong buntaga, duha ka butakal ang karga sa ilang serbis. Dunay ni-teks nga magpahabal sa iyang anay. Sila na mismo ang mohatod sa butakal ngadto sa lugar sa anay. Dunay dakong karatula sa atubangan sa side car sa tora-tora nga daw gamay nga kamalig nga nag-ingon, ‘SERVICE BUTAKAL.’ Nakasal sila sa miaging tuig, atol sa Valentine’s Day.

(KATAPUSAN)