SA PAGPAMUWAK SA MGA KAPAYAS

Ngano man, Inday, nga matag kidlap Sa akong mga mata nga magsil-ing nimo Moulpot man akong kasingkasing Morag buntog nga buot molighot Gikan sa iyang halwa nga hagip-ot? Ug masingo ko ang kahumot sa hangin Nga nagsabwag sa alimyon sa pagpamuwak Sa mga kapayas. Apan sa takna nga ako duol kanimo May di makitang kamot nga mosampong Sa akong baba aron di ko ikabatbat Kining kahibulongang pagbati nga naumol Sulod sa akong dughan. Tipigan ko na ba lang kining gugma Sa ngiob nga suok sa akong dughan Aron king kasingkasing dili na mohandom Kanimo? Sa ingon dili na ko motan-aw nimo, Dili na mobakho tungod sa gugmang gitago. Apan angay nga ibungat ko kanimo Kining gibati ko aron di mokuhol Ang linumpat ning kasingkasing. Buksan ko kining dughan aron masimba mo Giunsa ko ikaw pagmahal ilabi na kon Ang kahumot sa alimyon sa pagpamuwak Sa mga kapayas dagiton sa huyuhoy Sa kagabhion ngari sa akong tambuanan.